General Motors կոնցեռնը պատրաստվում է կրկին կյանք տալ Hummer մակնիշին եւ ստեղծել էլեկտրական ամենագնացների ու պիկապների նոր ընտանիք, գրում է Մոտոր-ը:
Ընկերությունը պատրաստվում է երեք միլիարդ դոլար ներդնել Դետրոյտում նոր գործարան կառուցելու համար, որտեղ կարտադրվեն նոր պրեմիալ ամենագնացներ ու պիկապներ էլեկտրական ուժային սարքավորումներով: Վերլուծաբանների կարծիքով՝ դա թույլ կտա ամերիկյան կոնցեռնին տեղ գտնել ցածր մրցակցությամբ ավտոմոբիլային շուկայի բարձր եկամտաբերություն ունեցող սեգմենտներում, որոնցում GM-ն ունի եկամուտ ստանալու առավել մեծ հնարավորություն: BT1 կոդային անվանման ներքո ծրագիրը ենթադրում է GMC մակնիշի էլեկտրական պիկապի ստեղծում 2022 թվականին եւ Cadillac էլեկտրական ամենագնացի թողարկում 2023 թվականին:
Սակայն, աղբյուրները հաղորդում են, որ էլեկտրական ուժային սարքավորումներով այդ երկու ավատոմեքենաները կարող են շուկայում հայտնվել լեգենդար Hummer մակնիշի ներքո, որը 2010 թվականին վերացել էր պահանջարկի կտրուկ անկման եւ General Motors-ի ծանր ֆինանսական դրության հետեւանքով: Ապրանքանիշը նորից թողարկելու մասին վերջնական որոշումը դեռեւս չի ընդունվել, սակայն իրադարձությունների այդպիսի զարգացման հավանականությունը շատ մեծ է: Այդ դեպքում պիկապը կվաճառվի շուրջ 90 000 դոլարով, իսկ ամենագնացի արժեքը կգերազանցի 100 000 դոլարը: Նոր էլեկտրական պլատֆորմը կտարբերվի ճկունությամբ եւ թույլ կտա տարբեր էլեկտրաքարեր մշակել դրա հիման վրա:
