Այսօր կարեւոր օր է, քանի որ տասնամյակների պայքարից հետո ԱՄՆ Ներկայացուցիչների պալատում վերջապես կքվեարկեն Հայոց ցեղասպանության ճանաչման համար: Այս մասին ԱՄՆ Ներկայացուցիչների պալատում քննարկումների ընթացքում հայտարարել է ԱՄՆ կոնգրեսական Բրեդ Շերմանը:
Նրա խոսքով՝ ԱՄՆ-ը վաղուց պետք է ճանաչեր Հայոց ցեղասպանությունը: «Սակայն մեզ մշտապես ասում էին նման քայլի չդիմել Թուրքիայի հետ մեծ դաշինքի պատճառով: Մեծ դաշի՞նք: Դա մեծ դաշինք էր Թուրքիայի համար: Մենք պաշտպանել ենք նրանց կոմունիզմից, Խորհրդային միությունից: Մենք 23 մլրդ դոլարի օգնություն ենք տրամադրել, եւ մենք ենք մեղավոր, որ Իրաքի հյուսիսում անկախ Քրդստան չի ձեւավորվել: 1915-1923-ը Օսմանյան կայսրությունը 1,5 մլն հայի սպանեց, դա 20-րդ դարի առաջին ցեղասպանությունն է»,- ասել է նա:
«Կասկած չկա, որ դա տեղի է ունեցել, նույնիսկ վարչակազմն անցած շաբաթ մեր հանձնաժողովում ցուցմունք է տվել: 1,5 մլն հայի սպանությունը 20-րդ դարի մեծագույն հանցանքներից մեկն է, եւ դա չի վիճարկվում: Ժամանակն է ճանաչել Հայոց ցեղասպանությունը՝ Ամերիկայի պատվի բիծը մաքրելու համար: Գերմանիան ցեղասպանություն է իրագործել Երկրորդ համաշխարհային պատերազմի ժամանակ եւ ճանաչել է դա: Գերմանիան բարգավաճող եւ ուժեղ ժողովրդավարական երկիր է դարձել: Թուրքիան շարունակում է հերքել ցեղասպանությունը: Ապա օրենք է ընդունում, որը կանխում է ցեղասպանության քննարկումը»,- հավելել է Շերմանը: Նրա խոսքով՝ Թուրքիան ԱՄՆ-ի մեծ դաշնակից կդառնա միայն ցեղասպանությունը ճանաչելուց հետո:
«Այսպիսով, այսօր ամենահարմար պահն է՝ ճանաչելու 20-րդ դարի առաջին ցեղասպանությունը: Մենք պետք է դա վաղուց անեինք: Մենք դա պետք է անենք ամեն տարի ապրիլին Հայոց ցեղասպանության տարելիցի օրը, սակայն մենք դա կսկսենք այսօր եւ այստեղ: Եվ միայն այդ ժամանակ Ամերիկան վերջապես կմիանա շատ այլ երկրների, որոնք ճանաչել են ցեղասպանությունը»,- եզրափակել է կոնգրեսականը:
Նշենք, որ քվեարկությունը կկայանա քննարկումներից հետո:
