Նախորդ տարվա դեկտեմբերից ջրազուրկ է Գյումրիի Բուլվարային թաղամասի 5-րդ բազմաբնակարան շենքի բնակչության ուղիղ կեսը: Ձմռանը սառել է շենքը սնուցող ջրատար համակարգը, իսկ մարտին ջրախողովակները վթարվել են, ջրով են լցվել շենքի մի շարք բնակարաններ:
«Արդեն 4-րդ ամիսն է, նույնիսկ 4-ժամյա ջրամատակարարումից չենք կարող օգտվել, ջրազուրկ ենք, շենքում ուրիշ բնակարան էլ ջուր չունի, որ բերենք, որտեղից ջուր հայթայթենք»,-դժգոհել է 82 ամյա Ռոզա Դավթյանը, ով ի տարբերություն իր հարեւանների, չի կարողանում ամեն օր մինչեւ 7-րդ հարկ ջուր հասցնել:
«Մարտ ամսին սառած խողովակներից ջուր է եկել, բայց քանի որ դրանք վնասված էին, մի քանի բնակարաններ ջրով լցվեցին: Հարեւաններով փակել ենք ջրագծերն ու մեկ ամսից ավելի ջրմուղի վթարավերականգնող բրիգադի հետ միասին փնտրում ենք վթարված հատվածներն ու չեն գտնում»,-ասել է մեկ այլ բնակիչ Սարուխան Եդիգարյանը:
Մասնագետները հանգել են այն եզրակացության, որ վնասված հատվածը գտնվում է շենքի փակ բնակարաններից մեկում: Իսկ բազմաբնակարանում մեկ ու կես տասնյակից ավելի փակ դռներ կան:
«Շիրակ ջրմուղկոյուղի» ընկերությունը հայտարարություն է տարածել ու տարածք է հրավիրել շենքի բոլոր բնակարանատերերին, բայց բացականերից ոչ մեկը չի ներկայացել, ինչը մասնագետներին հիմքեր է տվել ենթադրելու, որ այդ բնակարանատերերը հանրապետությունից բացակայում են:
