Մեքսիկայի նախագահ Անդրես Մանուել Լոպես Օբրադորը ԱՄՆ նախագահ Դոնալդ Թրամփի հետ հեռախոսային բանակցությունների արդյունքներով հայտարարել է, որ Մեքսիկայում արդարադատությունը երկրի կառավարության գործն է, փոխանցում է ՏԱՍՍ-ը:
«Նախագահ Թրամփի միջոցով ես հայտնել եմ իմ խորագույն ցավակցությունները Չիուաուայի եւ Սոնորայի սահմանին միջադեպի զոհերի հարազատներին եւ մտերիմներին: Նրան շնորհակալություն եմ հայտնել օգնելու պատրաստակամության համար եւ հայտնել, որ արդարադատությամբ զբաղվում են Մեքսիկայի կառավարության մարմինները»,- Twitter-յան իր էջում նշել է Լոպես Օբրադորը:
Մեքսիկայի նախագահն այսպիսով հրապարակայնորեն մերժել է նախագահ Թրամփի կողմից ԱՄՆ օգնության մասին 2 առաջարկները, որն ավելի վաղ հայտարարել էր հարեւան երկրում կազմակերպված հանցավորության դեմ պայքարին անմիջապես միանալու մասին:
«Ժամանակն է, որ Մեքսիկան ԱՄՆ օգնությամբ պատերազմ հայտարարի թմրակարտելներին եւ դրանք երկրի երեսից ջնջի: Ձեր մեծագույն նախագահից միայն զանգի ենք սպասում»,- Լոպես Օբրադորի հետ բանակցությունների նախօրեին Twitter-ում գրել էր Թրամփը:
Առաջնորդների հայտարարությունները հաջորդել են մորմոն համայնքի անդամների զանգվածային սպանությանը, որը նախօրեին տեղի էր ունեցել երկրի հյուսիսում: Հանցագործները գնդակոծել էին կանանցով եւ երեխաներով 3 ավտոմեքենա, մահացել էր 9 մարդ, 6-ը հրազենային վիրավորումներ ստացել:
Կառավարության վարկածով՝ այս 3 մեքենաների շարասյունը, որոնցով ընտանիք էր երթեւեկում, կարող էին շփոթել հանցավոր խմբավորումների ավտոմեքենաների հետ. այս տեղանքում ազդեցության համար պայքարում են Խաղաղօվկիանոսյան կարտելի բջիջը եւ Չիուաուայից խմբավորումը: Ըստ մեկ ուրիշ վարկածի՝ հարձակումը տեղի հանցագործների կողմից վրեժխնդրության ակտ էր: Համայնքի որոշ անդամներ բռնության դեմ եւ շրջանում անվտանգության համար հանդես եկող ակտիվիստներ են:
Մեքսիկական ընդդիմության ներկայացուցիչները երկրի նախագահին կրկին կոչ են արել վերանայել երկրի անվտանգության ռազմավարությունը, գործող կառավարությանը մեղադրել են քաղաքացիների անվտանգությունն ապահովելու անընդունակության եւ կազմակերպված հանցավորության առաջ կապիտուլյացիայի ենթարկվելու մեջ:
«Կառավարության ինքնակամ կապիտուլյացիան կազմակերպված հանցավորության առջեւ, թմրամաֆիայի հետապնդումների, կալանումների եւ բռնագանձումների դադարեցումը բնակչությանը թողնում են բախտի քմահաճույքին... Կառավարությունը, որն անկարող է ապահովել անվտանգությունը, կայացած համարվել չի կարող,-տեղի ԶԼՄ-ների հետ հարցազրույցում ասել է Ազգային գործողություն կուսակցության պատգամավոր Մարկո Կորտեսը։
Վերջին տարիներին Մեքսիկան համակվել է բռնության ալիքով, որը հիմնականում պայմանավորված է կարտելների հակամարտությամբ դեպի ԱՄՆ կոկաինի տարանցումը վերահսկելու համար։ 2018 թվականին Մեքսիկայում սպանությունների ռեկորդային թիվ է գրանցվել. անվտանգության նախարարությունը տեղեկացրել է ավելի քան 33 հազար (2017-ին՝ 31.2 հազար) սպանության մասին։
