Jaguar Land Rover ընկերությունը կընդլայնի ամենագնացների շարքը միջին չափի էլեկտրականացված քրոսովերի հաշվին, որը տեղ կզբաղեցնի Range Rover Evoque-ի եւ Range Rover Velar-ի միջեւ։ Նորույթը կստեղծեն MLA-ի հարթակի վրա եւ կվաճառեն ամբողջովին էլեկտրական սարքավորումներով հագեցած տարբերակներով, ինչպես նաեւ չափավոր եւ լիցքավորվող հիբրիդային համակարգերով, հայտնում է Motor-ը։
Land Rover նոր քրոսովերը կդառնա ապրանքանիշի առաջին մոդելը, որի համար դիզայնը, հարմարավետությունը եւ ճանապարհներին պահվածքը ավելի առաջնային կլինեն, քան ամենագնացային հատկանիշները։ Հավանաբար, ապագայում Range Rover-ի ամբողջ շարքը կթողարկվի մայրուղիներում երթեւեկության որակի շեշտադրմամբ։
Land Rover-ի շեֆ-դիզայներ Ջերի Մակգովերնը AutoExpress-ին ակնարկել է ապրանքանիշի դիրքվորման մեջ առաջիկա փոփոխությունների մասին։ «Եթե այնպիսի ընկերություններ, ինչպիսին են Bentley-ն եւ Rolls-Royce-ը, կարող են ստեղծել ամենագնացներ, ապա ինչու Land Rover-ը կամ Range Rover-ը չեն կարող շքեղ ավտոմեքենաներ թողարկել»,- հռետորական հարց է տալիս մասնագետը։