Շուշին ազատագրվելու հաջորդ օրը ես մտածում էի՝ ինչու այսքան հեշտ զիջեցին Շուշին, ինչու այսքան հեշտ պարտվեցին, որ թվում էր Շուշին անառիկ է: Այս մասին, այսօր՝ նոյեմբերի 15-ին, լրագրողների հետ զրույցում նշեց ՀՅԴ անդամ Հրանտ Մարգարյանը, ով մասնակցում էր Վազգեն Մանուկյանի նախաձեռնած «Վերնատուն» ակումբի կազմակերպած համաժողովին:
«Հետո երբ քայլում էի Շուշիում, տեսնում էի, որ բակերը, այգիները մշակված չեն: Այսինքն նրանք չէին հավատացել իրենց վաղվա օրվան, դրա համար էլ չկարողացան պահել Շուշին:
Հիմա պատերազմի հավանականություն կա, մենք պատրաստվո՞ւմ ենք պատերազմին, թե ոչ: Իսկ եթե պատրաստվում ենք, պատրաստվում ենք, որ պարտվե՞նք, թե՞ հաղթենք:
Հիմա եթե մի ղեկավար ուզում է ժողովրդին ոտքի հանի եւ իրենից թվաքանակով մեծ հակառակորդին հաղթի, պետք է միասնականություն ստեղծի ժողովրդի մեջւ, հայրենասիրություն ստեղծի: Մեր մեջ դա՞ է տեղի ունենում, թե օր օրի պառակտում է, քայքայում է, նվաստացնում է: Ով խոսում է, թալանի ու կոռուպցիայի մի հոդված կպցնում են պոչին: Դրանք դարձել են տեռորի միջոց՝ քաղաքական միտքը խեղդելու համար: Այսպես մենք չենք կարող գնալ ու հաղթել կռվում: Այսօր ունենք վարկաբեկված սպայական կազմ, ունենք բանակ, որտեղ խոսում են միայն թալանի ու կոռուպցիայի մասին, որտեղ ապրիլյան նահատակներն են շահարկման նյութ դառնում»,-ասաց Հրանտ Մարգարյանը:
Նա անդրադարձավ վարչապետ Նիկոլ Փաշինյանի Արցախում արած հայտարարությանը, թե «Արցախը Հայաստան է եւ վերջ»:
«Ասում է՝ «Արցախը Հայաստան է եւ վերջ»: Դա ղարաբաղիցներին ասված խոսք է, այսինքն ես եմ քո վարչապետը, քո իշխանությունը շինծու է: Դրա համար է ասել, դա չի ասել ադրբեջանցիների համար: Ես վստահ եմ, որ ինքը ասելու է, որ երբ այդպիսի բան է հայտարարել, հենց դա է նկատի ունեցել: Ոչինչ, որ դա խանգարել է այն մարտավարությանը, որ ինքը մշակել է բանակցային սեղանի վրա:
Ասում է՝ երեք երկրների համար պետք է լուծումն ընդունելի լինի, եւ ոչ մի նախկին նախագահ նման բան չի ասել: Այսինքն ենթատեքստում ասում է՝ ես հավելյալ մի բան կարող եմ զիջել, որ նախորդները պատրաստ չէին զիջել: Էլ ի՞նչ պետք է զիջի, որ Լեւոն Տեր-Պետրոսյանից ավել զիջի: Այս շփոթը քաղաքական ղեկավարության կեցվածք չի»,-ընդգծեց նա:
