«Լուսավոր Հայաստան» կուսակցության պատգամավորները, որոնք կոնցեպտուալ կերպով համաձայն են քրեական ենթամշակույթի դեմ պայքարի գաղափարին, բայց ձեռնպահ են քվեարկում առաջարկված օրինագծին, դրսեւորում են բոլորի համար անհասկանալի վարքագիծ: Այս մասին նոյեմբերի 20-ին ԱԺ-ում ավանդական ճեպազրույցների ժամանակ ասաց իշխող «Իմ քայլը» դաշինքի պատգամավոր Մարիա Կարապետյանը:
Նրա խոսքով՝ ԼՀ գործընկերները կարող էին «կողմ» քվեարկել եւ արդեն դրանից հետո մինչեւ երկրորդ ընթերցման մեկնարկը առաջարկներ ներկայացնել:
«Եթե առաջարկները չընդունվեին, ապա այդ դեպքում նրանք կարող էին նաեւ «դեմ» քվեարկել: Դրանից բացի, ես «Բարգավաճ Հայաստան» կուսակցության ներկայացուցիչներից լսել եմ, որ պատժելի պետք է լինեն միայն կոնկրետ իրավախախտումները: Հիմա հարց՝ բանակում եւ հանրապետության ուղղիչ հաստատություններում փողով ազարտային խաղերը կոնկրե՞տ արարք է, թե՞ ոչ»,- պարզաբանեց Կարապետյանը:
