Միացյալ Նահանգներ հայկական պատվիրակության այցելության ժամանակ մենք հստակ շեշտադրում ենք կատարել ղարաբաղյան կարգավորման խնդրի վրա՝ հատկապես հաշվի առնելով, որ ԱՄՆ-ը ԵԱՀԿ Մինսկի խմբի համանախագահող երկրներից է։ Այս մասին նոյեմբերի 25-ին Ազգային ժողովում մամուլի ասուլիսի ժամանակ ասաց կառավարող «Իմ քայլը» դաշինքի պատգամավոր Տաթեւիկ Հայրապետյանը՝ ամփոփելով ԱՄՆ հայկական պատվիրակության այցի արդյունքները։

Նրա հավաստիացմամբ՝ իրենք բազմիցս նշել են, որ հայկական կողմը աշխատում է բանակցային միջավայրի բարելավման ուղղությամբ եւ հասկանում է հումանիտար միջոցառումների իրականացման կարեւորությունը։  «ԱՄՆ-ում դա կարեւոր են համարում։ Մենք նաեւ հանդիպել ենք Հայաստանում ԱՄՆ նախկին դեսպաններ Ջոն Հեֆերնի եւ Ջոն Էվանսի հետ։ Նրանք, մասնավորապես, ասել են, որ ԱՄՆ-ում վերջին ժամանակներս Հայաստանի իմիջի կտրուկ փոփոխություն եւ նրա դերի բարձրացում են նկատվել»,- ասել է Հայրապետյանը։