Եգիպտոսում դատարանը երկրի ամենահայտնի գրոհայիններից մեկին մահապատժի է դատապարտել կառավարական օբյեկտների վրա տասնյակ հարձակումների մասնակցելու համար, հայտնում է AP-ը։

Ռազմական դատարանի հայտարարության մեջ ասվում է, թե Խիշամ Էլ Աշմավին՝ հատուկ նշանակության ջոկատի նախկին անդամը, որը դարձել է իսլամիստական գրոհային, մեղավոր է ճանաչվել ահաբեկչության մեջ եւ դատապարտվել է կախաղանի։

Եգիպտական իշխանությունները 41-ամյա Էլ Աշմավիին կապում են մի քանի խոշոր հարձակումների, այդ թվում ՆԳ նախարար Մուհամմեդ Իբրահիմի դեմ 2013թ․ մահափորձի հետ, ինչպես նաեւ նրան մեղադրում են Լիբիայի հետ սահմանին անվտանգության ուժերի վրա հարձակվելու մեջ։

Լիբիա փախչելուց հետո նա փորձել էր հաստատվել երկրի արեւելքում իսլամական գրոհայինների եւ ծայրահեղականների շրջանում։ Էլ Աշմավին ստեղծել էր «Ալ Մուրաբիտուն» խմբավորումը, որը մեղադրվում է Եգիպտոսի Արեւմտյան անապատում հարձակումների մեծ մասի, այդ թվում 2017թ․ տեղի ունեցած գորհի մեջ, որի ժամանակ եկեղեցու ճանապարհին 30 քրիստոնյա ուխտավոր էր սպանվել։