Ռուսական կողմը Հայաստանից եւ Ղարաբաղից լրագրողների այցը Ադրբեջան եւ Ադրբեջանից լրագրողների այցը Հայաստան եւ Ղարաբաղ համարում է շփումները հաստատելուն ուղղված կողմերի մտադրության ցուցանիշ: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
Նրա խոսքով՝ ապրիլին ՌԴ ԱԳՆ ղեկավար Սերգեյ Լավրովի նախաձեռնությամբ անցկացված հանդիպման ժամանակ ՀՀ եւ Ադրբեջանի ԱԳՆ ղեկավարները համաձայնել են մարդասիրական հարցերի շուրջ աշխատանքներ սկսել: Դրանց թվում են ԶԼՄ-ների ներկայացուցիչների փոխայցերը: Այդ մասին համաձայնություն է ձեռք բերվել մարտին Վիեննայում: Նման այցեր են կայացել նոյեմբերի 17-21-ին ԵԱՀԿ գործող նախագահի անձնական ներկայացուցչի գլխավորությամբ:
«Մենք այդ համատեղ միջոցառումները դիտարկում ենք որպես շփումները հաստատելուն ուղղված կողմերի մտադրության ցուցանիշ: Մենք կարծում ենք, որ նման մարդասիրական ակցիաները, որոնք բնակչությանը խաղաղության պատրաստելու նպատակ ունեն, պետք է շարունակվեն: Եվ մենք, անկասկած, աջակցում ենք այդ միջոցառումներին»,- ասել է Զախարովան՝ հավելելով, որ մարդասիրական միջոցների հնարավոր ուղղություններից կարող է լինել անձանց ճակատագրերի թեթեւացումը, որոնք բանտարկված են կոնֆլիկտող կողմերի տարածքներում, ինչի մասին նշած է նախարարների եւ ԵԱՀԿ ՄԽ համանախագահների հայտարարության մեջ: