«Արեւելյան գործընկերության» Խորհրդարանական վեհաժողովի «Եվրանեսթի» լիագումար նիստի բացմանը իմ ելույթը ադրբեջանական պատվիրակությանը շոկի մատնող էր: Այս մասին դեկտեմբերի 12-ին ԱԺ-ում մամուլի ասուլիսի ժամանակ ասաց հայկական պատվիրակության ղեկավար, իշխող «Իմ քայլը» դաշինքի պատգամավոր Գայանե Աբրահամյանը:
Պատգամավորը նշեց, որ իր ողջույնի խոսքում պատմել է Հայաստանի եւ ԵՄ-ի հարաբերությունների, հանրապետության պարտավորությունների եւ Եվրամիությունից ու «Արեւելյան գործընկերության» պլատֆորմից ակնկալիքների մասին: «Ես ընդգծեցի, որ ԵՄ-ից մենք ակնկալում ենք աջակցություն եւ անվտանգության հարցերում նրանց դիրքորոշումը, ինչպես նաեւ աջակցություն ժողովուրդների ինքնորոշման իրավունքների սկզբունքի հարցում եւ Ղարաբաղի ժողովրդի անվտանգության ապահովում»,- նշեց Աբրահամյանը:
