Մենք ոչինչ չենք արել Wizz Air-ին գրավելու համար. այն, ինչ արել ենք, դա ավելի շատ ճկուն լինելն է օրենքը փոխելու եւ մեկնման հարկի (օդի հարկ-խմբ) հետ կապված: Այս մասին այսօր՝ դեկտեմբերի 16-ին, լրագրողների հետ հանդիպման ժամանակ նշեց Քաղաքացիական ավիացիայի կոմիտեի նախագահ Տաթեւիկ Ռեւազյանը:
«Որովհետեւ, երբ Wizz Air-ի դեպքում՝ ունենք 25 եվրոյի տոմս եւ ստիպված ենք 20 եվրո վճարել մեկնման համար, դա ավիաընկերության համար ընդունելի չէ: Wizz Air-ին խրախուսվում է նույն հիմքերով, ինչ ցանկացած այլ ընկերության»,-ասաց նա:
Ռեւազյանը նկատեց, որ քանի որ արդեն իսկ Վիեննա չվերթ իրականացնում է «Ավստրիական ավիաուղիները», այն նոր ուղղություն չէ, հետեւաբար, Wizz Air-ը պետք է վճարի մեկնման հարկը, իսկ Վիլնյուսը նոր ուղղություն է, հետեւաբար այդ հարկից ազատվելու է Wizz Air-ը»,-ընդգծեց Ռեւազյանը:
«Wizz Air-ին ոչ մի գումար չի սուբսիդավորվել: Մենք նույն խթաններն ենք տրամադրել, ինչ որեւէ այլ ընկերության, որոնք «Զվարթնոցից» նոր ուղղություններով չվերթների են իրականացնում: Այո, Գյումրիի օդանավակայանից չվերթների համար որոշակի խթաններ տրամադրում ենք, բայց էլի խոսքը ոչ թե կոնկրետ ավիաընկերության մասին է, այլ բոլորի»,-ասաց նա:
Տաթեւիկ ռեւազյանը նաեւ տեղեկացրեց, որ չեն պատրաստվում միայն Wizz Air-ին եւ RyanAir-ին բերելով դադարեցնել այդ գործընթացը. «Իհարկե, ցանկանում ենք էլ ավելի մեծ մրցակցություն ապահովել, սակայն մեկ ավիաընկերություն բերելու համար երկար տարիներ են անհրաժեշտ: Կփորձենք հնարավորինս արագ անել դա»:
