Դեկտեմբերի 17-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Արեւելք-Արեւմուտք միջազգային ինստիտուտի (Նյու Յորք, ԱՄՆ) նախագահ եւ գործադիր տնօրեն Ուիլյամ Փարքերին:
Հանդիպմանը պրն. Ուիլյամ Փարկերը Նորին Սրբությանը ներկայացրեց ինստիտուտի գործունեության նպատակները եւ կիբերանվտանգության, կանխարգելիչ դիվանագիտության, տնտեսական եւ տարածաշրջանային անվտանգության ոլորտներում կազմակերպության կողմից իրականացվող ծրագրերը:
Ամենայն Հայոց Կաթողիկոսը մասնավոր անդրադարձ կատարեց Մերձավոր Արեւելքում տիրող ծանր իրավիճակին, քրիստոնյա փոքրամասնություների խնդիրներին` մտահոգություն հայտնելով քրիստոնեական համայնքների նվազման առնչությամբ:
Զրույցի ընթացքում խոսվեց նաեւ Թուրքիայում կրոնական փոքրամասնությունների կյանքի, ղարաբաղյան հակամարտության ու դրա խաղաղ կարգավորմանն ի նպաստ Հայ Եկեղեցու կողմից ձեռնարկվող քայլերի եւ մի շարք տարածաշրջանային խնդիրների մասին:
Այս կապակցությամբ Գարեգին Երկրորդ Հայրապետը կարեւոր նկատեց նաեւ միջազգային հանրության կողմից գործադրվող ջանքերը` հանուն մարդկության խաղաղ ու բարօր կյանքի կերտման:
