2019 թվականին աշխարհում սպանվել է 49 լրագրող, ինչը 16 տարվա ընթացքում ամենացածր ցուցանիշն է: Այդ մասին հայտնել է «Լրագրողներ առանց սահմանների» կազմակերպությունը (RSF), հաղորդում է AFP-ը:
Կազմակերպության տվյալների համաձայն՝ վերջին 20 տարվա ընթացքում տարեկան մահանում է միջինում մոտ 80 լրագրող:
Կազմակերպության ղեկավար Քրիստոֆ Դելուարը նախազգուշացրել է, որ երկրներում խաղաղ պայմաններում սպանված լրագրողների թիվը մեծ է: 10 լրագրող է մահացել Մեքսիկայում: «Լատինական Ամերիկան, որտեղ 14 լրագրող է սպանվել, հավասարվել է Մերձավոր Արեւելքի ցուցանիշներին»,- ասել է նա՝ հավելելով, որ չնայած դրան՝ կոնֆլիկտների գոտիներում մահացած լրագրողների թիվը նվազել է:
RSF-ի տվյալներով՝ավելի շատ լրագրողներ են հայտնվում ճաղերի հետեւում: Մոտ 389 մարդ է հայտնվել բանտում 2019-ին, ինչի 12 տոկոսով ավելի շատ է անցած տարվա համեմատ: Գրեթե կեսը գտնվել է Չինաստանում, Եգիպտոսում եւ Սաուդյան Արաբիայում:
Միեւնույն ժամանակ, 57 լրագրող է գերի պահվում Սիրիայում, Եմենում, Իրաքում եւ ՈՒկրաինայում:
