Բեռլինում 2016թ․ սուրբծննդյան տոնավաճառի ժամանակ ահաբեկչությունից հետո ԳԴՀ հատուկ ծառայությունները երկրի տարածքում կանխել են ինը իսլամիստական գրոհ։ Այս մասին կիրակի օրը, դեկտեմբերի 22-ին, հայտնել է Welt am Sonntag թերթը՝ հղում կատարելով լրագրողների հարցմանը Քրեական գործերով դաշնային գերատեսչության (BKA) պատասխանին, հայտնում է DW-ը։
Միայն այս տարվա նոյեմբերին հատուկ ծառայությունների գործունեության հետեւանքով հաջողվել է խուսափել երկու նոր ահաբեկչությունից, նշվում է տեղեկատվության մեջ։ Կանխված ահաբեկչությունների մասին հստակ տեղեկատվություն գերատեսչությունը չի հայտնել։
Ինչպես այնուհետեւ նշում է թերթը, նոյեմբերին Օֆենբախում, որը Մայնի Ֆրանկֆուրտի մերձակայքում է, ահաբեկչություն պլանավորելու կասակածանքով կալանավորվել է 24-ամյա ենթադրյալ իսլամիստ։ Մի քանի օր անց Բեռլինում կալանավորվել է 37-ամյա սիրիացի, որը համացանցում պայթուցիկ նյութերի ստեղծման մասին տեղեկատվություն է փնտրել։ Երկու գործով էլ հետաքննություն է իրականացվում, հայտնում է Welt am Sonntag-ը՝ հղում կատարելով դաշնային դատախազության տվյալներին։
BKA-ի իսլամիստական ահաբեկչության դեմ պայքարի նոր բաժնի ղեկավար Սվեն Կուրենբախը հայտարարել է հոկտեմբերի վերջին «Իսլամիստական պետություն» ահաբեկչական խմբավորման պարագլուխ Աբու Բաքրա Ալ Բաղդադիի ոչնչացման հետ նախապատրաստվող ահաբեկչությունների հնարավոր կապի մասին։ «ԻՊ-ի առաջնորդի մահվանից հետո ուժեղացել են Արեւմուտքում ահաբեկչություններ կատարելու կոչերը»,- նշել է նա։