«Հյուսիսային հոսք-2» գազատարը կառուցող ընկերությունների դեմ ԱՄՆ պատժամիջոցները մի քանի ամսով կհետաձգեն նախագծի ավարտը եւ կբարձրացնեն դրա արժեքը, հայտարարել է Անգելա Մերկելի կողմից ղեկավարվող գերմանական պահպանողականների ներկայացուցիչը, հայտնում է Reuters-ը։
Շվեդ-հոլանդական Allseas ընկերությունը ավելի վաղ հայտնել էր ԱՄՆ պատժամիջոցներից խուսափելու համար խողովակների տեղադրման աշխատանքների դադարեցման մասին։
Nord Stream 2 AG օպերատորը հայտնել է, որ կաշխատի կարճ ժամկետում նախագիծը ավարտելու ուղղությամբ։ ԱՄՆ-ի կարծիքով՝ «Հյուսիսային հոսք-2»-ը Եվրոպային ավելի կախված կդարձնի ռուսական մատակարարումներից։ ԱՄՆ-ը միաժամանակ ձգտում է մեծացնել եվրոպական երկրներին հեղուկ բնական գազի վաճառքը։
Մոսկվան հույս ուներ նոր խողովակաշարով մատակարարումները սկսել 2020թ․ կեսին։ «Կան այլընտրանքներ, որոնք կհանգեցնեն հապաղումների, ինչպես նաեւ ծախսերի մեծացմանը»,- ասել է պահպանողականների ներկայացուցիչ Պետեր Բայերը։
Մերկելն ավելի վաղ դեմ էր հանդես եկել ԱՄՆ պատժամիջոցներին, սակայն ասել էր, որ իր կառավարությունը պատասխան միջոցներ չի կիրառի։
ՌԴ ԱԳ նախարար Սերգեյ Լավրովը նախօրեին հայտարարել էր, որ գազատարի աշխատանքը կմեկնարկի՝ անկախ պատժամիջոցներից։
1230 կմ երկարությամբ եւ տարեկան 55 մլրդ խ/մ հզորությամբ գազատարի նախագիծը իրականացնում է «Գազպրոմը»՝ բրիտանա-նիդեռլանդական Shell, գերմանական Uniper եւ Wintershall, ֆրանսիական Engie եւ ավստրիական OMV ընկերությունների ներդրումների ներգրավմամբ։