«Նոր Հայաստանի» իշխանությունները նվազագույն պատկերացում չունեն այն մասին, թե ղարաբաղյան հակամարտությունն ինչպես կարգավորեն, բանակցային գործընթացում ինչպիսի ռազմավարություն օգտագործեն: Այս մասին դեկտեմբերի 24-ին տարվա արդյունքների ամփոփման համաժողովում ասաց քաղաքագետ Երվանդ Բոզոյանը:
Փորձագետը կարծում է, որ երկրում իշխանության են եկել պատահական մարդիկ, որոնք երբեք այս խնդրին գործնականում չեն բախվել, նրանք զբաղվել են միայն մարդու իրավունքներով: «Այս պատճառով նրանց թիվ մեկ խնդիրն է Ղարաբաղը բանակցություններում գլխավոր կողմ դարձնելը, որ հնարավոր լինի ազատվել այս պատասխանատվությունից»,- պարզաբանեց Բոզոյանը:
Քաղաքագետի կարծիքով՝ ղարաբաղյան հակամարտության կարգավորման համար Հայաստանը կարիք ունի ուժեղ, հզոր երկրի առկայության, որակյալ քաղաքական էլիտայի եւ տնտեսական համակարգի: «Որպեսզի մենք կարողանանք ղարաբաղյան հիմնախնդրում հաջողության հասնել, պետք է դառնանք ուժեղ եւ հզոր երկիր: Ուրիշ տարբերակ չկա: Մենք պետք է այս խնդիրը 20-30 տարով սառեցնենք եւ հզորանանք: Այլ տարբերակ չկա, մնացյալը ինքնախաբեություն է, դիվանագիտական հարթակում մենք հաջողության չենք հասնի»,- նշեց նա:
Երվանդ Բոզոյանի խոսքով՝ Մադրիդյան սկզբունքները մեզ թույլ են տալիս ժամանակ շահել եւ հաջողության հասնել: «Եթե Մադրիդյան սկզբունքները չլինեին, մենք ժամանակ չէինք ունենա: Հակամարտության սառեցումը մեզ ձեռնտու է, որովհետեւ մենք, փաստորեն, որեւէ զիջման չենք գնում, մենք ժամանակ շահելու եւ այնքան ուժեղ պետություն դառնալու հնարավորություն ունենք, որ Ադրբեջանի հետ պարիտետը փոխենք»,- եզրափակեց քաղաքագետը:
