Ավարտվել է ՀՀ աշխատանքի եւ սոցիալական հարցերի նախարար Զարուհի Բաթոյանի պաշտոնական Այցը Իրանի Իսլամական Հանրապետություն:

Դեկտեմբերի 22-25-ը Իրանում տեղի է ունեցել աշխատանքի եւ սոցիալական հարցերի ոլորտում հայ-իրանական աշխատանքային խմբի առաջին նիստը` 2011 թ.-ին ստորագրված «Հայաստանի Հանրապետության կառավարության եւ Իրանի Իսլամական Հանրապետության կառավարության միջեւ աշխատանքի եւ սոցիալական հարցերի բնագավառում համագործակցության մասին» փոխըմբռնման հուշագրից բխող համատեղ Գործողությունների ծրագիրը ստորագրելու եւ երկկողմ ոլորտային համագործակցության ուղղությունները քննարկելու եւ հստակեցնելու նպատակով:

ԻԻՀ կոոպերացիայի, աշխատանքի եւ սոցիալական բարեկեցության նախարար Մոհամադ Շարիաթմադարիի հրավերով Իրան էր այցելել ՀՀ աշխատանքի եւ սոցիալական հարցերի նախարար Զարուհի Բաթոյանի գլխավորած պատվիրակությունը:

Իրանցի գործընկերների հետ հանդիպումների ժամանակ նախարարը համոզմունք է հայտնել, որ այցը հարմար առիթ է աշխատանքի եւ սոցիալական պաշտպանության ոլորտում երկու երկրների միջեւ համագործակցությանը նոր թափ հաղորդելու, լավագույն փորձին եւ նորարարական նախաձեռնություններին ծանոթանալու, կառուցողական երկխոսության խթանման համար:

Զարուհի Բաթոյանը նշել է, որ համատեղ գործողությունների ծրագրի ստորագրումը լրացուցիչ եւ հզոր խթան կհանդիսանա երկկողմ ոլորտային համագործակցությունն ինստիտուցինոնալ հիմքերի վրա ամրապնդելու եւ կապերն ընդլայնելու համար:

Նշենք, որ 2018 թվականին Երեւանում կայացած՝ Հայաստանի Հանրապետության եւ Իրանի Իսլամական Հանրապետության միջկառավարական համատեղ հանձնաժողովի 15-րդ նիստի արդյունքում ստորագրված փոխըմբռնման հուշագրի «Աշխատանք, սոցիալական ապահովում եւ կոոպերացիա» կետով նախատեսվում էր քայլեր ձեռնարկել 2018 թվականին Թեհրանում կամ Երեւանում համապատասխան հանդիպում կազմակերպելու ուղղությամբ՝ փոխըմբռնման հուշագրից բխող Գործողությունների ծրագիր մշակելու եւ հետագա համագործակցության ուղղությունները եւ շրջանակները քննարկելու նպատակով:

Այս տարի հուլիսին Թեհրանում կայացած՝ Հայաստանի Հանրապետության եւ Իրանի Իսլամական Հանրապետության միջկառավարական համատեղ հանձնաժողովի 16-րդ նիստի ընթացքում իրանական կողմը ՀՀ ԱԳՆ ներկայացուցչին էր հանձնել Փոխըմբռնման հուշագրից բխող Գործողությունների ծրագրի նախագիծը: Իրանական կողմը նաեւ իր պատրաստակամությունն էր հայտնել 2019 թվականի 4-րդ եռամսյակի ընթացքում Թեհրանում կազմակերպել երկու երկրների աշխատանքային խմբի առաջին համատեղ նիստը:

Նշենք, որ համատեղ գործողությունների ծրագիրը նախատեսում է համագործակցություն տեխնիկական եւ մասնագիտական վերապատրաստման, աշխատանքի եւ զբաղվածության եւ սոցիալական ապահովության ոլորտներում:

Այցի ընթացքում Զարուհի Բաթոյանն այցելել է նաեւ հայկական եկեղեցի, «Մոշիրիե» արհեստագործական ուսումնարան եւ «Իրանի հաշմանդաշների եւ ողնաշարի վնասվածքների աջակցման կենտրոն»։