Կառավարության շենքի դիմաց այսօր՝ դեկտեմբերի 26-ին, հավաքվել են ազգությամբ եզդի Արթուր Իշխանի Աջամյանի հարազատները, պահանջում են հանդիպում ՀՀ վարչապետ Նիկոլ Փաշինյանի հետ։ Նշենք, որ պաշտպանության բանակի հյուսիս-արեւելյան ուղղությամբ տեղակայված զորամասերից մեկի պահպանության տեղամասում դեռեւս չպարզված հանգամանքներում մահացու հրազենային վիրավորում է ստացել Արթուր Աջամյանը։
«Մենք մեր հույսը չենք կորցնում, մեր հույսը դնում ենք վարչապետ Նիկոլ Փաշինյանի վրա։ Եթե հույսը մեռավ, մենք ամեն ինչի պատրաստ ենք։ Եթե Նիկոլը չիջավ, մեզ պատասխան չտվեց։ Բոլորն էլ գիտեն, բոլորն էլ տեղյակ են։ Դեպքը պետք է բացահայտվել է։ Ես սրտից հիվանդ, անհեր երեխուն պահեցի, մեծացրեցի, ինչի՞ համար արեցի։Վաշտի հրամանատարն ո՞ւր է, մեռե՞լ է, ո՞ւր են իր սերժանտները։ Ինձ որ մի բան լինի, ո՞վ տեր կկանգնի»,- ասաց Աջամյանի մայրը։
Նրա փորձեց ոստիկանական պատը ճեղքել եւ մտնել Կառավարության շենք, ինչի արդյունքում տեղի ունեցավ հրմշոտ հարազատների եւ ոստիկանության միջեւ։
Հրմշտոցից հետո հավաքվածները որոշեցին փակել Կառավարության դիմացի ավտոճանապարհը, ինչը ոստիկանները թույլ չտվեցին։
Ավելի վաղ հայտնել էինք, որ դեկտեմբերի 2-ին՝ ժամը 06:50-ի սահմանում, ՊԲ հյուսիս-արեւելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է:
Զինծառայող Արթուր Իշխանի Աջամյանի մահացու հրազենային վիրավորում ստանալու, իսկ պարտադիր ժամկետային զինծառայող Դավիթ Հարությունի Մելիքբեկյանի հրազենային վիրավորումներ ստանալու դեպքի առթիվ երրորդ կայազորային քննչական բաժնում ՀՀ քրեական օրենսգրքի 34-104-րդ հոդվածի 2-րդ մասի 1-ին կետով հարուցվել է քրեական գործ, կատարվում է նախաքննություն:
