Իշխանության ներկայացուցիչներն անհարգալից վերաբերմունք են ցուցաբերում, եւ գործը երբեմն հասնում է բացահայտ սպառնալիքների՝ ասելով, թե «ձեզանով կզբաղվեն համապատասխան մարմինները»: Այս մասին դեկտեմբերի 27-ին լրագրողների հետ հանդիպման ժամանակ հայտարարեց «5-րդ ալիքի» գործադիր տնօրեն Հարություն Հարությունյանը:
Նա հիշեցրեց, որ հեռուստաալիքի նկատմամբ անհարգալից վերաբերմունքի թարմ դրսեւորում է երեկ ԱԺ պաշտպանության եւ անվտանգության հարցերով մշտական հանձնաժողովի նախագահ, «Իմ քայլի» պատգամավոր Անդրանիկ Քոչարյանի պահվածքը:
Տնօրենքի խոսքով՝ վերջին մեկ տարում հեռուստաալիքի լսարանն էապես մեծացել է, փոխվել է խմբագրության աշխատանքի նկատմամբ մարդկանց վերաբերմունքը, եւ դա, անկասկած, նյարդայնացնում է իշխանություններին: «Մենք բազմաթիվ զանգեր ենք ստանում հեռուստադիտողներից, որոնք պատրաստ են աջակցել մեզ»,- հավելեց նա:
Հիշեցնենք, որ դեկտեմբերի 26-ին Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանը բավարարել է «5-րդ ալիք» հեռուստաընկերության սեփականատեր Արմեն Թավադյանին կալանավորելու միջնորդությունը: