Վրաստանի ՆԳՆ սահմանապահ ոստիկանության աշխատակիցները վրաց-ադրբեջանական չհամաձայնեցված հատվածում զենքի անօրինական ձեռքբերման, պահպանման, կրելու եւ պատանդ վերցնելու մեղադրանքով կալանավորել են Վրաստանի քաղաքացի Գ․ Ի․-ին։
Այս տարվա հունվարին Վրաստանի քաղաքացի Գ․ Ի․-ն գտնվել է սահմանապահ գոտում։ Սպառնալով կիրառել հրազեն եւ նռնակ՝ նա վրացական սահմանապահին ստիպել է իր հետ անցնել սահմանի չհամաձայնեցված հատված, հայտնում է «Նովոստի-Գրուզիա»-ն։
«Միջադեպի ժամանակ Գ․ Ի․-ն մի քանի կրակոց է արձակել։ Վրաստանի ՆԳՆ ոստիկանության օպերատիվ եւ արդյունավետ աշխատանքի արդյունքում իրավիճակը ժամանակին կարգավորվել է։ Տվյալ պահին միջադեպն ամբողջովին վերացված է»,- հայտարարել է ՆԳՆ-ն։
Գերատեսչության հաղորդագրությամբ՝ անցկացվում է հետաքննություն։ Նախարարությունում հայտարարել են, որ ՆԳՆ-ն միջադեպի հետ կապված արդյունավետ համագործակցության համար շնորհակալություն է հայտնել իր աշխատակիցներին եւ ադրբեջանցի գործընկերներին։
