Toyota ընկերությունը ԱՄՆ-ից հետ է կանչում Toyota եւ Lexus մակնիշների մոտ 700 հազար ավտոմեքենա վառելիքի պոմպերի անսարքության պատճառով, տեղեկացնում է CNN-ը։
Ընկերությունն իր հայտարարությունում տեղեկացնում է, որ պոմպերը կարող են խափանվել եւ հանգեցնել շարժիչների վնասվելուն։
«Եթե խափանումը տեղի ունենա արագ ընթացքի ժամանակ, դա կարող է բարձրացնել վթարի հավանականությունը»,- նշվում է ընկերության հաղորդագրությունում։
Ընկերությունը նաեւ տեղեկացնում է, որ անսարքությունների փաստով ընթանում է հետաքննություն։ Հենց որ խնդիրը լուծվի, այդ մասին մեքենատերերին կտեղեկացնեն էլեկտրոնային փոստով։ Խնդիրն ընկերությունում մտադիր են լուծել մարտին։
Մասնավորապես, հետ կկանչվեն 2018-2019 թվականների արտադրության հետեւյալ մոդելների ավտոմեքենաները. Lexus LS 500, LC 500, RC 350, RC 300, GS 350, IS 300, ES 350, LX 570, GX 460, RX 350, Lexus NX 300, RX 350L, GS 300, Toyota 4Runner, Camry, Highlander, Land Cruiser, Sequoia, Sienna, Tacoma, Tundra, Toyota Avalon եւ Corolla։