Ամենամեծ խնդիրը հանրային մուլտիպլեքսն է, որը Հայաստանում չունի ո՛չ հայեցակարգ, ո՛չ փիլիսոփայություն: Այս մասին հունվարի 16-ին «Օրենսդրական փոփոխություններ տեսալսողական մեդիածառայությունների ոլորտում» թեմայով խորհրդարանական լսումների ընթացքում հայտարարեց Հեռուստատեսության եւ ռադիոյի ազգային հանձնաժողովի նախագահ Տիգրան Հակոբյանը:
Նրա խոսքով՝ տարիների ընթացքում դրանք պարզապես չեն ձեւավորվել:
«Ինչո՞ւ է ստեղծվում հանրային մուլտիպլեքս: Այն ստեղծվում է բոլոր երկրներում, որպեսզի երկրի բնակչությանը կարողանա անվճար կրթական, տեղեկատվական եւ զվարճացնող տեղեկատվություն տրամադրել: Եվ բնական է, որ բոլոր երկրներում հանրային հեռարձակողները կոշտ ստանդարտների են ենթարկվում: Միայն Հայաստանում է, որ այդ ստանդարտները դեռեւս չեն մշակվել: Բնականաբար, երբ այդ ստանդարտները մշակվեն, ոչ բոլոր հեռուստաընկերությունները կարող են համապատասխանել դրանց: Մեզ մոտ այդ առումով իսկական «աջաբսանդալ» է առաջացել»,- ասաց Հակոբյանը:
Միեւնույն ժամանակ, նա խոստովանեց, որ ՀՌԱՀ-ը դեռեւս չի հասկանում՝ արդյոք տեխնիկապես հնարավոր է ունենալ մասնավոր հանրապետական եւ մարզային մուլտիպլեքսներ: