Կառավարության դիմաց բողոքի ակցիա իրականացնող անասնապահների բողոքի ակցիան ավարտվեց։ Նրանք նշեցին, որ երկուշաբթի շարունակելու են ակցիաները։
Այսօր անասնապահների ներկայացուցիչները հանդիպել են ՀՀ կառավարության նամակների և դիմում բողոքների ընդունման բաժնի պետ Ալեքսանդր Ղազարյանի հետ։
Լրագրողների հետ զրույցում անասնապահները ասացին․ «Հարցը քննարկման է դրված։ Մեզ լիարժեք պատասխան չտրվեց։ Պատրաստվում ենք երկուշաբթի կրկին հավաքվել, և բոլոր ֆերմերներին, որոնց հետաքրքրում է այս հարցը, եկեք, մեկ մարդու պես հավաքվենք, ժամանակ պահանջենք։
Մեզ այսօր Ղազարյանն էր ընդունել, ասել է հիմա հարցը քննարկվում է։ Մեր պահանջն է, որ 6 ամիս ժամանակ տան, մինչև մարդկանց հասանելի լինի սպանդանոցները»։
Հիշեցնենք, որ ֆերմերները բողոքում են այն կարգավորման դեմ, ըստ որի՝ հունվարի 15-ին մսի վաճառքի համար գործում է 5-րդ ձևը, որը տրամադրվում է սպանդանոցների կողմից այնտեղ մորթված անասունների մսի համար։ Ֆերմերները պնդում են, որ սպանդանոցների քանակը շատ քիչ է այդպիսի կարգավորման պարտադիր լինելու համար։