Բելառուսի նախագահ Ալեքսանդր Լուկաշենկոն պատմել է նավթի այլընտրանքային մատակարարումների մասին, հաղորդում է «Բելթա»-ն:
«Տեսնում եք, որ ամեն տարի Նոր տարուց առաջ մենք ստիպված ենք ծնկի գալ եւ աղաչել այդ նավթամթերքները»,- նշել է նա:
Լուկաշենկոն հավելել է, որ Ռուսաստանի նախագահ Վլադիմիր Պուտինի հետ զրույցում ամենեւին բլեֆ չի արել եւ հայտնել է, թե ինչպես կգործի Բելառուսը, եթե ռուսական կողմը չփոխի իր դիրքորոշումը:
Նրա խոսքով՝ այլընտրանքային մատակարարումների երթուղիներից մեկը Բալթիկայում նավահանգիստների միջոցով երթուղին է, եւ այդ կերպ արդեն մատակարարվում է նորվեգական նավթի խմբաքանակ: Եվս մեկ բալթյան երթուղի է Գդանսկից «Դրուժբա» նավթամուղի ճյուղերից մեկով երթուղին:
Լուկաշենկոյի խոսքով՝ երրորդ ուղղությունը եւս արդեն փորձարկվել է: Մասնավորապես, խոսքը Ուկրաինայի միջով դեպի Սեւ ծով մատակարարումն է:
«Եվ չորրորդը՝ Ռուսաստանը: Մենք չենք հրաժարվի այդ նավթից: Սակայն այդպիսով տեղի կունենա մատակարարումների դիվերսիֆիկացում: Մենք սկսել ենք փորձարկել այդ երթուղիները, ցանկանում ենք տեսնել՝ ինչ կստացվի, թե ինչ կորուստներ կունենանք համեմատած ռուսական նավթի ներկայիս գնի հետ: Դա բլեֆ չէ: Մենք պարզապես ցանկանում ենք տեսնել՝ ինչ կունենանք, որքան կկորցնենք»,- հայտարարել է նա:
Նրա խոսքով՝ Բելառուսը պայմանավորվում է համաշխարհային շուկայի բոլոր մասնակիցների հետ՝ ԱՄՆ-ի, Սաուդյան Արաբիայի, ԱՄԷ-ի: «Նրանց հետ փայլուն հարաբերություններ ունենք: Նրանք ասում են՝ որքան պետք է, այնքան կմատակարարենք: Իհարկե, դա համաշխարհային գին է: Սակայն նավթի որակն այնտեղ ավելի լավն է»,- հավելել է Բելառուսի նախագահը:
