Արտասահմանում հայկական լոբբիի աշխատանքի արդյունքները մենք կտեսնենք Հայոց ցեղասպանության տարելիցին մոտ: Այս մասին այսօր` փետրվարի 7-ին, լրագրողների հետ հանդիպման ժամանակ ասաց Հայաստանի Գիտությունների ակադեմիայի արեւելագիտության ինստիտուտի տնօրեն, թուրքագետ Ռուբեն Սաֆրաստյանը:
Նրա խոսքով՝ անցյալ տարի ԱՄՆ ընդունած երկու բանաձեւերը չեն կարող հետեւանքներ չունենալ ամբողջ աշխարհում Հայոց ցեղասպանության ճանաչման եւ դատապարտման գործում: Փորձագետը կարեւորեց հայ փորձագետների լուրջ վերլուծական աշխատանքի անցկացումը Մերձավոր Արեւելքում ընթացող գործընթացների հետ կապված, քանի որ բացառված չէ, որ մենք կանգնած ենք փոփոխությունների շեմին՝ նման 20-րդ դարասկզբին տեղի ունեցածին, երբ ստորագրվեց Սեւրի փաստաթուղթը՝ ուղղված Թուրքիայի հյուսիսում քրիստոնեական պետության ստեղծման հետ:
«Այսօր ամեն ինչ գնում է նրան, որ հայկական հարցը կարող է նորից արդիական դառնալ, բայց այլ բնույթ կունենա՝ հաշվի առնելով հայկական պետության առկայությունը, որը փափուկ ուժ կիրառելով՝ կարող է իր օրակարգն առաջ մղել աշխարհի շատ երկրների հասարակական եւ քաղաքական շրջանակներում»,- պարզաբանեց նա:
Սաֆրաստյանը նշեց, որ վերջին շրջանում փոփոխություն են կրել Ռուսաստանի եւ ԱՄՆ փոխհարաբերությունները: «Վաշինգտոնը սկսել է ռազմավարական հարցերում ակտիվորեն հաշվի առնել Մոսկվայի դիրքորոշումը եւ նրան անվանել Չինաստանից հետո աշխարհում երկրորդ հակառակորդը: Ռուսաստանն իր հերթին անչափ ակտիվ է ՄԱԿ-ում, ինչի դրսեւորումը դարձավ ԱԽ նիստ հրավիրելու նրա նախաձեռնությունը գլոբալ խնդիրներ լուծելու համար: Այս ամենը, ինչպես նաեւ Մերձավոր Արեւելքում իրավիճակը վկայում են այն մասին, որ մենք պետք է պատրատվենք ամենաանսպասելի սցենարների»,- ամփոփեց թուրքագետը: