Հայաստանի Հաշվեքննիչ պալատը պետական պարտքի կառավարման վարչությունում 2017 և 2018 թվականներին 37 ռիսկ է արձանագրել: Այս մասին, այսօր՝ փետրվարի 18-ին, ԱԺ ֆինանսավարկային եւ բյուջետային հարցերի մշտական հանձնաժողովի նիստին հայտարարեց ՀՀ Հաշվեքննիչ պալատի մեթոդաբանության, վերլուծության եւ միջազգային կապերի վարչության պետ Կարեն Առուստամյանը:
Նա նշեց, որ աուդիտի հիմնական նպատակը պետական պարտքի կառավարման համակարգի արդյունավետության բարձրացման եղանակների հայտնաբերումն էր: Իսկ բուն աուդիտն իրականացվել է 2017 եւ 2018 թվականներին: «Այս 37 ռիսկի հիման վրա մենք 44 առաջարկություն ենք ներկայացրել, որոնք, ըստ աուդիտորների, կարող են օգտակար լինել պետական պարտքի կառավարման համակարգի բարելավման համար: Աուդիտն արդեն ունի իր հետեւանքները: Մի քանի օր առաջ Ֆինանսների նախարարի հատուկ հրամանով որոշվել էր այն միջոցառումների եւ քայլերի պլանը, որոնք ուղղված են աուդիտորների առաջարկությունների կատարմանը, գրանցված գործոնների վերացմանը կամ ուղղիչ, կանխարգելիչ գործողությունների իրականացմանը»,- ասաց Առուստամյանը:
