Երեքշաբթի օրը Տեխասի Արեւելյան շրջանի դաշնային դատարանը մերժել է Huawei-ի` ԱՄՆ կառավարությանն ուղղված հայցը: Ընկերությունը պահանջում է ոչ իրավազոր ճանաչել 2019 թվականի օրենքը, որն ԱՄՆ պետական հաստատություններին արգելում է օգտագործել այս չինական կորպորացիայի (NDAA) սարքավորումները կամ ծառայությունները: Այս մասին են վկայում դատարանի էլեկտրոնային բազայի տեղեկությունները, փոխանցում է ՏԱՍՍ-ը:
Դատարանի դիրքորոշումը
Հրամանագիրը ստորագրվել է շրջանային դատավոր Ամոս Մազանտի կողմից եւ թվագրված է փետրվարի 18-ով: «Այն, ինչը Huawei-ը Կոնգրեսի կողմից փաստերի հակասահմանադրական մեկնաբանում է անվանում, ավելի ճիշտ կլիներ բնութագրել որպես Կոնգրեսի կողմից ԱՄՆ կիբերանվտանգության համար պոտենցիալ սպառնալիքի մանրակրկիտ ուսումնասիրություն: Կոնգրեսում քննությունն, ի վերջո, հանգեցրել է օրինագծի ընդունմանը, որը պրոֆիլակտիկ պատասխան է դարձել նման սպառնալիքին»,- պարզաբանել է դատավորը: Նրա տեսանկյունից, ԱՄՆ կառավարությունը, կիրառելով այս օրենքը, չի սահմանափակել ամբաստանյալի ՝ ԱՄՆ տարածքում բիզնես վարելու իրավունքը եւ չի խախտել նրա սահմանադրական իրավունքները:
«Huawei-ը հիասթափված է այսօրվա դատական որոշումից: Մենք գիտակցում ենք ազգային անվտանգության կարեւորությունը, բայց ԱՄՆ կառավարության մոտեցումը 2019-ի NDAA-ի իրականացման նկատմամբ անվտանգության կեղծ զգացողություն է ստեղծում եւ միաժամանակ խախտում է Huawei-ի սահմանադրական իրավունքները»,- նշվում է ԱՄՆ-ում չինական կորպորացիայի ներկայացուցչության հայտարարության մեջ: Huawei-ը կշարունակի դատական գործի հարուցմանն ուղղված քայլերը:
Հարցի նախապատմությունը
Դատական հայցը ներկայացվել է անցյալ տարվա մարտին Տեխասում, քանի որ ԱՄՆ-ում Huawei-ի գլխամասային գրասենյակը գտնվում է այս նահանգում: Չինական կորպորացիան պահանջել է անվավեր ճանաչել օրենքը, որը ԱՄՆ պետական գերատեսչություններին արգելում է օգտագործել իր սարքավորումներն ու դիմել իր ծառայություններին: ԱՄՆ իշխանություններն այս արգելքը հիմնավորել են նրանով, որ կորպորացիան, իբր, սերտորեն համագործակցում է Չինաստանի իշխանությունների հետ:
Ընկերության փաստաբաններն ընդգծել են, որ նշված միջոցները ձեռնարկվել են ամերիկյան կողմից առանց դատարանի որոշման եւ հավասար են անհիմն հետապնդմանը ԱՄՆ իշխանությունների կողմից: Huawei-ի ներկայացուցիչները պնդում էին, որ իրենց արտադրանքը որևէ կերպ չի կարող սպառնալ ԱՄՆ անվտանգությանը:
ԱՄՆ-ի պատժամիջոցները Huawei-ի դեմ
Անցյալ տարվա մայիսին ԱՄՆ նախագահ Դոնալդ Թրամփը հրամանագիր էր ստորագրել, որն արտակարգ դրություն էր մտցնում երկրի տեղեկատվական եւ հաղորդակցական ենթակառուցվածքն արտաքին սպառնալիքներից պաշտպանելու համար: Այս կապակցությամբ ԱՄՆ առեւտրի նախարարությունը 2019 թվականի մայիսի 17-ից Huawei-ին ավելացրել էր սև ցուցակում` ազգային անվտանգությանը սպառնալիքի պատճառով: Մայիսի 20-ին նա ընկերությանը 90 օր ժամկետով ժամանակավոր թույլտվություն էր տրամադրել, որը վերականգնում էր ընկերության իրավունքը` սպասարկելու ցանցերը եւ ծրագրային ապահովման թարմացումներ տրամադրելու իր բջջային սարքերի համար: Օգոստոսի 19-ին, այնուհետեւ` նոյեմբերի 18-ին, դրա ժամկետը երկարաձգվել էր եւս 90 օրով: Մասնավորապես, իշխանություններն ամերիկյան Microsoft կորպորացիային թույլտվություն էին տրամադրել Huawei-ին ծրագրային ապահովում վաճառելու համար: Նախանցած տարվա օգոստոսին Թրամփը հրամանագիր էր ստորագրել, որով ԱՄՆ կառավարության գերատեսչություններին արգելվում էր օգտագործել Huawei-ի և ZTE-ի կողմից արտադրված սարքավորումները:
