«Իրատես» թերթը գրում է. «Հանրաքվեն իրականացնելու համար կառավարությունը Կենտրոնական ընտրական հանձնաժողովին կհատկացնի 2 միլիարդ 553,049 հազար դրամ, 660 միլիոն դրամ էլ՝ հանրաքվեի քվեարկության ժամանակ առնվազն 1500 տեղամասերից քվեարկության ընթացքի եւ քվեարկության արդյունքների ամփոփման գործընթացի տեսանկարահանման եւ միաժամանակյա համացանցային հեռարձակման գործընթացն ապահովելու նպատակով։

Այն ԿԸՀ-ին, որի նախագահը նախկին իշխանությունների ժամանակներից պաշտոնավարող Տիգրան Մուկուչյանն է, որին ընդդիմադիրի «մունդիրով» Փաշինյանը հազար անգամ քննադատել է։ Այս ամենը զավեշտալի է նաեւ մեկ այլ դիտանկյունից. մի «նախկին» կազմակերպում է ընտրական գործընթաց, որպեսզի հեռացնի մյուս «նախկինին»։ Տեսնես ո՞րն է տարբերությունը այդ երկու «նախկինների», որ մեկին ազգովին հեռացնում ենք, մյուսին՝ ապսպրում զբաղվել դրանով։

Գործառութային տեսանկյունից էլ շատ զավեշտալի իրավիճակ է ստեղծվել։ Հայաստանի բոլոր ընդդիմադիր գործիչները, այդ թվում` Նիկոլ Փաշինյանը, մշտապես դժգոհել են, որ ՍԴ-ն վավերացրել է կեղծված ընտրությունները։ Իրականում ՍԴ-ն ընդամենը համադրել է ԿԸՀ-ի տրամադրած պաշտոնական տեղեկույթն ընտրությունների վերաբերյալ եւ որոշում կայացրել։ Այսինքն, եթե կեղծվել է, հաստատ ոչ ՍԴ-ում։ Այսքանից հետո շատ հետաքրքիր է՝ ո՞րն է Տիգրան Մուկուչյանի «գրավչությունը», որ իշխանությունը հենց նրան է վստահում հանրաքվեի անցկացումը։

Ի դեպ, այս վստահությամբ իշխող մեծամասնությունը նաեւ օրինականացնում է նախկինում անցկացված այն բոլոր ընտրությունները, որոնք Տիգրան Մուկուչյանի «քավորությամբ» են վավերացվել»:

Առավել մանրամասն՝ թերթի այսօրվա համարում