Մեծ Բրիտանիայի Ուորիքի համալսարանի աստղագետները գտել են անոմալ զանգվածեղ սպիտակ գաճաճ, որը գտնվում է Երկրից 150 լուսատարի հեռավորությամբ: Այս օբյեկտը արտասովոր քիմիական բաղադրություն ունի, որը մատնացույց է անում, որ այն ձեւավորվել է 2 սովորական սպիտակ գաճաճների բախման ժամանակ՝ որպես գերնոր հրաշքով խուսափելով ոչնչանալուց, հայտնում է «Լենտան»՝ վկայակոչելով Eurekalert!-ում հրապարակված հայտարարությունը:
WDJ0551+4135 աստղը հայտնաբերվել է Gaia տիեզերական հեռադիտակով: Պարզվել է, որ սպիտակ գաճաճի լուսոլորտում ածխածնի ավելցուկային քանակություն կա, ինչը չի նկատվել համանման այլ օբյեկտներում: Հետազոտողները սովորաբար դիտարկում են ջրածնի արտաքին շերտը՝ հելիումի ոչ մեծ խառնուրդով կամ պարզապես հելիումի եւ ջրածնի խառնուրդով: Այս դեպքում, սակայն, նրանք հայտնաբերել են ջրածնի եւ ածխածնի խառնուրդ, որոնք պետք է գտնվեին առանձին շերտերում՝ բաժանված հելիումի շերտով:
Հայտնի է, որ հին աստղերը Հարդագողի ճանապարհի կենտրոնի շուրջ ավելի արագ են պտտվում, քան երիտասարդ աստղերը, իսկ WDJ0551+4135-ը տեղաշարժվում է ավելի արագ, քան մյուս հայտնի սպիտակ գաճաճների 99 տոկոսը: Սա նշանակում է, որ այս օբյեկտն ավելի հին է, քան սառչելու նույն արագությամբ սպիտակ գաճաճները: Քանի որ այն 2 անգամ ավելի զանգվածեղ է միջին սպիտակ գաճաճից, գիտնականները հանգել են այն եզրակացության, որ երկնային մարմինն առաջացել է միաձուլման հետեւանքով:
Գիտնականների կարծիքով՝ 2 սպիտակ գաճաճների բախումը տեղի է ունեցել 1,3 միլիարդ տարի առաջ, սակայն այս օբյեկտները մինչեւ միաձուլման պահը կարող էին գոյություն ունենալ արդեն շատ միլիարդավոր տարիներ:
