Կորոնավիրուսի հետ կապված տուրիստական այցերի չեղարկումներ են գրանցվել ոչ միայն Ծաղկաձորի ուղղությամբ, այլեւ` ամբողջ Հայաստանի, եւ բաժին են ընկնում մարտ, ապրիլ եւ մի փոքր էլ մայիս ամիսներին: Այս մասին մարտի 3-ին NEWS.am-ի թղթակցի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը:
Նրա խոսքով` դեռ վաղ է խոսել այն մասին, թե ինչ վիճակագրական փոփոխությունների է դա հանգեցնելու մինչեւ տարեվերջ:
«Օրինակ, այն տարում, երբ խուճապ էր առաջացել թռչնագրիպի պատճառով, համաշխարհային տուրիզմը նախորդ տարիների համար աննախադեպ աճ էր գրանցել: Այնպես որ, դժվար է հստակ կանխատեսել, թե կորոնավիրուսն ինչ ազդեցություն կունենա տարեվերջյան ցուցանիշների վրա»,- ասաց նա:
Մեխակ Ապրեսյանը նշեց, որ տուրիզմը միշտ զգայուն է փոփոխվող պայմանների, այդ թվում նաեւ պատերազմների, լարված քաղաքական իրավիճակների եւ հիվանդությունների նկատմամբ, և կորոնավիրուսը նույնպես չի կարող չազդել պոտենցիալ տուրիստի տրամադրության վրա եւ մտահոգություններ չառաջացնել:
«Հայաստանում արվում է ամեն ինչ` խուճապը վերացնելու համար, եւ ամեն ինչ վերահսկվում է: Հետեւաբար, իմաստ չունի չեղարկել, օրինակ, ուղեւորությունները դեպի Ծաղկաձոր միայն այն պատճառով, որ մարդիկ այնտեղ կարանտին են անցնում` հաշվի առնելով, որ նրանք չեն հեռանում հյուրանոցից, իսկ Golden Palace-ը բարձրունքի վրա է»,- շեշտեց փորձագետը:
Նա վստահություն հայտնեց, որ որեւէ ռիսկ չկա, եւ ավելին, պատշաճ գովազդի դեպքում կարելի է նույնիսկ մեծացնել պոտենցիալ զբոսաշրջիկների հետաքրքրությունը Ծաղկաձորի նկատմամբ, քանի որ կարանտինի շրջանում այնտեղ մարդկանց համար ծայրահեղ հարմարավետ պայմաններ են ստեղծվել, ինչը, անշուշտ, հումանիզմի դրեւորում է:
«Եթե համեմատել նրա հետ, թե ինչպես են մարդիկ կարանտին անցնում Ադրբեջանում, տարբերությունը Հայաստանի օգտին զգալի է, եւ այդ գործոնը, գրագետ մոտեցման դեպքում, կարել է որպես տուրիստական գովազդ օգտագործել»,- եզրափակեց Մեխակ Ապրեսյանը: