Էսօր թարմ թեմա են գտել, թե վարչապետը պետական տրանսպորտային միջոցով՝ ուղղաթիռով եկել է Սյունիք՝ քարոզարշավի: Այս մասին, ասյօր՝ մարտի 10-ին, Քաջարանում «Այո»-ի քարոզարշավի ժամանակ նշեց ՀՀ վարչապետ Նիկոլ Փաշինյանը:
Նրա խոսքով, ինքը Մեղրիից Քաջարան էլ է պետական ավտոմեքենայով եկել, որովհետեւ այլ կերպ չի կարող. «Այդ «ոչիստների» ժամանակ ընդունված օրենքի համաձայն, վարչապետը համարվում է հատուկ պահպանության ենթակա պաշտոնյա եւ նույնիսկ չի կարող հրաժարվել այդ պահպանությունից: Հիմա եթե ես էստեղից փախնեմ, իմ հետեւից վազելու են, որ բռնեն: Տենց մի անգամ դեպք եղել է, ընտանիքով փախել ենք, իրենք տագնապ էին հայտարարել եւ Երեւանով մեկ մեզ էին փնտրում: Այսինքն սա պետական պահպանություն է, որից ես չեմ կարող հրաժարվել»,-ասաց Փաշինյանը:
Անդրադառնալով լուրերին, թե վարչապետի պաշտոնն ստանձնելուց հետո Նիկոլ Փաշինյանը ճոխությունների սիրահար է դարձել, նա ընդգծեց. «Ասում են՝ ես ճոխությունների սիրահար եմ: Ես հիմա նստում եմ այն բազկաթոռի վրա, որի վրա 2 տարի նստել է Կարեն Կարապետյանը: Վարչապետի աշխատասենյակում ոչ մի բան չեմ փոխել, բոլորը մնացել է նույնը:
Թող «ոչիստները» օրինականության մասին դատողություն անելուց առաջ թող պատասխանեն իմ կոնկրետ հարցին, որի արդյունքում մենք կստուգենք օրենքի եւ օրինականության նկատմամբ իրենց վերաբերմունքը: Հարց՝ արդյոք Սերժ Սարգսյանը 2013-ին օրինական ճանապարհով է ընտրվել ՀՀ նախագահ, արդյոք ժողովուրդը նրան ընտրել է: Երկրորդ հարցը՝ 2008-ին արդյոք Սերժ Սարգսյանը օրինական ճանապարհով է ընտրվել: Թող այս երկու հարցերին պատասխանեն, դրանից մենք կհասկանան, թե նրանք օրենքի ու օրինականության մասի՞ն են մտածում, թե՞ իրենց թիկունքում կանգնած «ոչիստների» մասին:
Էդ մարդիկ ասում էիք՝ հեսա թեժ գարուն ենք անում, թեժ աշուն ենք անում, բա հեսա թեժ գարուն է, բա ո՞ւր եք, չեք երեւում, գնացեք, հանրահավաքներ արեք: Ասում էինք՝ ժողովուրդը հիասթափվել է իշխանությունից, հեսա մենք հետ ենք գալու: Լավ առիթ է, եկեք ժողովրդին ոտքի հանեք, ձեր ասելիքն ասեք, ո՞ւր եք:
Չեք երեւում, որովհետեւ չպետք է երեւաք: Դուք այլեւս գնացել եք եւ այլեւս չեք վերադառնալու, որովհետեւ ժողովուրդը թույլ չի տա իր ձեռքից խլել իր իսկ իշխանությունը»,-ասաց ՀՀ վարչապետը:
Նա հավաստիացրեց, որ իրենք ժողովրդի հետ շփվելու պրոբլեմ չունեն. «Մեզ ժողովրդի հետ շփվելու համար միջնորդ է պե՞տք: Ավելի լավ է գնանք կամուրջից գցվենք»:
