Սիրիայում ուժերի վերադասավորումը դաշինք կամ համաձայնագիր է ենթադրում Ռուսաստանի Դաշնության եւ Իրանի միջեւ: Այս մասին հայտարել է իրանագետ Վարդան Ոսկանյանը ռուս-թուրքական հարաբերություններին նվիրված քննարկումների ժամանակ:
Սակայն, շարունակեց նա, նման դաշինքը հավերժ չէ` չնայած նրան, որ Մոսկվայի եւ Թեհրանի միջեւ հարաբերություններում ավելի քիչ հակասություններ կամ մրցակցություններ կան, քան Ռուսաստանի եւ Թուրքիայի հարաբերություններում: «Իրանի երկարաժամկետ ծրագրերում են էներգակիրների ելքը դեպի Միջերկրական ծով եւ Եվրոպա եւ տրանսպորտային հաղորդակցությունը: Հետեւաբար Սիրիայում մասնակցությունը պայմանավորված չէ միայն կրոնական բաղադրիչով: Այս համատեքստում Ռուսաստանի Դաշնությունը չի կարող ոգեւորվել մրցակցի` Իրանի գործողություններով: Այժմ, չնայած այս ամենին, երկրներն ակտիվ համագործակցում են սիրիական խնդրի լուծման ուղղությամբ»,- ասաց իրանագետը՝ արձանագրելով, որ Ռուսաստանի Դաշնությունը զբաղված է երկնքի պաշտպանությամբ, իսկ Իրանը` ցամաքային ոլորտում` աջակցելով մի շարք ուժերի:
Խոսելով ղարաբաղյան հարցում Իրանի դիրքորոշման մասին, Ոսկանյանն արձանագրեց, որ պաշտոնականը խաղաղ կարգավորմանն աջակցելն է: «Լարվածություն են առաջացնում տարածքային ամբողջականությանն աջակցելու մասին հայտարարությունները: Սակայն հարկ է հիշել, որ Ղարաբաղը երբեք անկախ Ադրբեջանի մաս չի եղել: Այդպիսով, սա ամենեւին չի նշանակում, որ Իրանը սատարում է Ղարաբաղի` Ադրբեջանի կազմում լինելու գաղափարին: Բացի այդ, հարկ է հիշել, որ յուրաքանչյուր երկիր գործում է հիմնականում իր սեփական շահերից ելնելով: Իրանը բազմազգ երկիր է, եւ Իրանի իշխանությունները ոչ մի դեպքում չեն հայտարարի ժողովուրդների ինքնորոշման իրավունքին աջակցության մասին, քանի որ հիպոթետիկորեն դա կարող է հանգեցնել արեւմտյան Ադրբեջանի բաժանման մասին հայտարարությունների»,- հիշեցրեց փորձագետը:
Նա արձանագրել է, որ Հայաստան-Արցախ-Իրան-Ադրբեջան սահմանների փոփոխությունը չի բխում Իրանի շահերից, ընդ որում, այնքանով, որքանով դա բխում է հենց հայկական կողմի շահերից: Նույն կերպ երրորդ ուժի հայտնվելը չի բխում Իրանի, որեւէ խաղաղապահ ուժի շահերից: «Թե՛ բազմազգ կոալիցիայի, թե՛ առանձին պետության: Այս համատեքստում Իրանին ձեռնտու է տեղական ուժերով իրավիճակի վերահսկումը: Մեզ համար եւս ավելի մեծ երաշխիք չի կարող լինել, քան հայ զինվորը», - նշեց իրանագետը:
