ԲԴԽ անդամներին չեք նշանակում, նոր ասացիք՝ Վերաքննիչ պալատի անդամին չեք նշանակում. երկիրն ի՞նչ է անելու, եթե դուք ձեր գործը չեք անում։ Այս մասին այսօր՝ մարտի 17-ին, ՍԴ նիստին ԱԺ ներկայացուցչին դիմեց ՍԴ դատավոր Ֆելիքս Թոխյանը։

«ԱԺ-ն սահմանադրական պատասխանատվություն կրո՞ւմ է, որ իր ՍԴ պարտականությունները չի կատարում»,- հարցրեց Թոխյանը։

ԱԺ ներկայացուցիչն էլ պատասխանեց, որ յուրաքանչյուր պետական մարմին իր սահմանադրական լիազորությունները չիրականացնելու դեպքում կրում է համապատասխան պատասխանատվություն։

«ԱԺ-ն շարունակում է իր աշխատանքը կատարել։ Այդ պատճառով էլ Սահմանադրության մեջ նախատեսված է մի դրույթ, որը վիճարկվում է։ Եթե որոշ դեպքերում անհնարինությունից ելնելով ոչ համաձայնության գալով հնարավոր չի եղել ընտրել սահմանադրական մարմին ժամանակավոր այդ հարցի լուծումը տրվել է նախագահին, մինչեւ կգան ընդհանուր հայտարարի»,- ասաց ԱԺ ներկայացուցիչը։

ՍԴ դատավորը շեշտեց, որ ինքը շատ լավ հասկանում է, թե ինչու չի նշանակում նախագահը եւ խորհուրդ տվեց ԱԺ ներկայացուցչին. «Լավ իմաստով ես ձեզ մի խորհուրդ էլ տամ, կան երկրներ, որոնք երբ պաշտոններին չեն կարող նշանակել, նկատի ունեմ քաղաքական մարմիններին, այնքան ժամանակ մինչեւ նոր նշանակում չանեն»։

ԱԺ ներկայացուցիչն ասաց, որ քաղաքական եւ իրավական մարմինների պաշտոնների նշանակման միջեւ էական տարբերություններ կան. «Քաղաքական մարմինների դեպքում, եթե նախարարին հանեն, նրա տեղակալը կփոխարինի նրան։ Իսկ նշված մարմինները, օրինակ ԲԴԽ անդամը փոխարինող անձ չունի»։

Նշենք, որ նախագահի կողմից վիճարկվում են «ՀՀ դատական օրենսգիրք սահմանադրական օրենքի» 81-րդ հոդվածի 5-րդ մասի եւ 82-րդ հոդվածի, «Դատախազության մասին» օրենքի 35-րդ հոդվածի, «Մարդու իրավունքների պաշտպանի մասին» սահմանադրական օրենքի 12-րդ հոդվածի, «Հեռուստատեսության եւ ռադիոյի մասին» օրենքի 39-րդ հոդվածի, «Հաշվեքննիչ պալատի մասին» օրենքի 17-րդ հոդվածի, «ՀՀ կենտրոնական բանկի մասին» օրենքի 18 եւ 19-րդ հոդվածների, «Ազգային ժողովի կանոնակարգ» սահմանադրական օրենքի 144 եւ 145-րդ հոդվածների, «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքի 2 եւ 3-րդ հոդվածների Սահմանադրությանը համապատասխանության հարցը։