Այս արձանագրության վավերացումը հնարավորություն կտա հետեւել զինամթերքի գնագոյացման գործընթացին ՀԱՊԿ անդամ երկրներում: Այս մասին մարտի 23-ին ՀՀ Ազգային ժողովում Պաշտպանության եւ անվտանգության հարցերով մշտական խորհրդարանական հանձնաժողովի նիստին Հավաքական անվտանգության պայմանագրի մասնակից պետությունների միջեւ ռազմատեխնիկական համագործակցության հիմնական սկզբունքների վերաբերյալ 1992 թվականի մայիսի 15-ին կնքված համաձայնագրում փոփոխություններ կատարելու մասին չորրորդ արձանագրության վավերացման քննարկման ժամանակ ասաց ՀՀ պաշտպանության նախարարի տեղակալ Տիգրան Բալայանը:
Փոխնախարարի խոսքով` խորհրդարանին ներկայացված արձանագրությունը ստորագրվել է 2017-ի նոյեմբերի 30-ին Մինսկում: Նա պարզաբանել է, որ ՀԱՊԿ անդամ երկրներում զինամթերքի գնագոյացման գործընթացի նկատմամբ մոնիտորինգ իրականացնելու հնարավորություն կունենան ՀԱՊԿ անդամ երկրների ինչպես ազգային զինված ուժերը, այնպես էլ մյուս բանակային կազմավորումները, զորամասերը, իրավապահ մարմինները, հատուկ ծառայությունները, բանակի տարածաշրջանային խմբերն ու այլ ուժային կառույցները: Բացի այդ, հնարավոր կլինի զենք եւ ռազմական տեխնիկա ձեռք բերել եւ մատակարարել` ազգային զինված ուժերի համար վերազինման գործընթացը ՀԱՊԿ անդամ երկրների ներքին գներով կարգավորող օրենսդրությանը համապատասխան:
Նշենք, որ արձանագրությունը դրական եզրակացություն է ստացել խորհրդարանական հանձնաժողովի կողմից: