Հիդրոէներգետիկան կշարունակի մնալ Արցախի տնտեսության կարեւորագույն ոլորտներից մեկը: Այս մասին այսօր` ապրիլի 15-ին, մամուլի ասուլիսին ասաց Արցախում նախագահական ընտրությունների երկրորդ փուլի հաղթող Արայիկ Հարությունյանը:
Նրա խոսքով` հիդրոէլեկտրակայանի շինարարությունը կշարունակվի, բայց բնապահպանական պահանջները կխստացվեն: «Հիդրոէներգետիկան կլինի հիմնական այլընտրանքային վերականգնվող աղբյուրը, կարեւոր դեր կխաղա Արցախի տնտեսության մեջ, կապահովի Արցախի էներգետիկ անկախությունը եւ կարեւոր դեր կունենա Հայաստանի էներգետիկ ոլորտում»,- հայտարարեց Հարությունյանը: Ըստ Հարությունյանի` արեւային էներգիան կարող է ապահովել բնակչության կարիքների 10-20 տոկոսը, իսկ քամուց ստացվող էներգիան Արցախում բացարձակ հեռանկարային չէ:
Պատասխանելով փոքր հիդրոէլեկտրակայանների կառուցման հետ կապված քննադատության մասին հարցին` Հարությունյանը կատեգորիկ կերպով հայտարարեց, որ ցանկացած ապօրինի միջամտություն հիդրոէլեկտրակայանի կառուցմանը կպատժվի օրենքով: «Եթե շինարարությունը չի համապատասխանում բնապահպանական չափանիշներին, կպատժենք` սկսած թույլտվություն տվածներից: Բայց եթե բնապահպանական խախտումներ չլինեն, եթե ինչ-որ մեկը փորձի միջամտել, մենք դա կհամարենք վնաս պետությանը եւ նույնիսկ` ահաբեկում եւ դիվերսիա: Նրանք, ովքեր դեմ են մեր էներգետիկ անկախությանը, մեր թշնամիներն են»,- ասաց Հարությունյանը:
«Ես հիդրոէլեկտրակայան չունեմ»,- ամեն դեպքում, հավաստիացրեց Հարությունյանը: