Երեկ գիշեր Գեղարքունիքում տեղի ունեցած սպանության գործով կասկածվողը աշխատում է «Հարավկովկասյան երկաթուղի» ՓԲԸ-ում: Այս մասին NEWS.am-ին հայտնեց Շողակաթ համայնքի ղեկավար Սուլիկո Շուշանյանը:
Նշենք, որ Ծովագյուղ-Շորժա-Վարդենիս ավտոճանապարհին՝ Porsche Cayenne մակնիշի ավտոմեքենայի մեջ հայտնաբերվել էր Նորք 9-րդ զանգվածի բնակիչ՝ 36-ամյա Գեղամ Աբրահամյանի դին։
«Երեկ գիշեր է դեպքը եղել, չգիտենք մանրամասները: Ձերբակալվածը մեր գյուղի բնակիչ է, 32-ամյա Արթուր Կիրակոսյանը, ինքը ադեկվատ երիտասարդ է, ապրում էր հոր, մոր կնոջ եւ 2 անչափահաս երեխաների հետ, ոչ մի վատ բան չենք տեսել: Հայրն էլ պատերազմի մասնակից է ու հաշմանդամ: Մեր գյուղից եւս մեկ քանի հոգու հրավիրել են ոստիկանություն` որպես վկայի»,-ասաց նա` նշելով, որ Արթուրը իր հետ անձնական զենք է ունեցել:
Համայնքապետի խոսքով` նույնիսկ 32-ամյա երիտասարդի ծնողները տեղյակ չեն, թե ինչպես է եղել դեպքը:
Նշենք, որ փաստի առթիվ հարուցվել է քրեական գործ՝ ՀՀ քր. օր-ի 104 հոդվածի 1-ին մասի և 235 հոդվածի 1-ին մասի հատկանիշներով։