ՀՀ ԱԳ նախարար Զոհրաբ Մնացականյանը «Հայաստանի մանուկներ» բարեգործական հիմնադրամի (ՔՈԱՖ) կողմից մեկնարկած «INSTALIVE» հանդիպումների շարքի (Ինստագրամյան ուղիղ միացում) օնլայն հարցազրույցի ժամանակ հայտարարել է. «Մենք խոնարհում ենք մեր գլուխները, սակայն չենք լռում»:
«Իրականում մենք պետք է մեզ հաղթող զգանք: 105 տարի առաջ մեզ ցանկանում էին ոչնչացնել: Մենք ամուր կանգնած ենք ոտքի վրա: Մեզ հաջողվեց պաշտպանել մեր ինքնությունը, ստեղծել պետություն, հզոր Սփյուռք: Դա մեր պատասխանն է հանցագործներին»,-ասել է նա:
Նախարարը նշել է, որ Ցեղասպանությունը վերապրածների ժառանգների 4-5 սերունդ կա, եւ մինչ այժմ չի վերականգնվել արդարությունը: «Դա նշանակում է, որ վերքը շատ խորն է: Մեր եւ այլ ազգերի համար չափազանց կարեւոր է ցեղասպանությունների կրկնությունը թույլ չտալը: Եվ երիտասարդ սերունդը պետք է հասկանա, որ պետության ամրապնդումը պաշտպանություն է նման ոտնձգություններից: Հայաստանը շարունակում է աշխատանքն ազգային եւ միջազգային մակարդակով՝ նպատակ ունենալով կանխել ցեղասպանություններն ու զանգվածային հանցագործությունները: Անհրաժեշտ է վաղ փուլում վերհանել նախանշանները, որոնք հանգեցնում են ցեղասպանության՝ մարդու իրավունքների խախտումը, խտրականությունը, քսենոֆոբիան»,-նշել է նախարարը:
Զոհրաբ Մնացականյանը հիշեցրել է, որ ցեղասպանությունների կանխարգելումը Հայաստանի արտաքին քաղաքականության կարեւորագույն մասերից մեկն է արդեն 22 տարի շարունակ: Հայաստանի նախաձեռնությամբ դեկտեմբերի 9-ը հռչակվել է որպես ցեղասպանությունների զոհերի հիշատակման եւ ցեղասպանությունները կանխարգելման միջազգային օր: «Մենք դեռեւս պայքարում ենք մերժման եւ անօրինականության դեմ: Անօրինականությունը ծնում է հանցավոր հույս, որ կարող է խուսափել պատժից»,-նշել է ԱԳ նախարարը: