Moody's միջազգային վարկանիշային գործակալությունն այս տարի աշխարհում ավտոմեքենաների վաճառքի 20 տոկոս անկում է կանխատեսել: Նախորդ կանխատեսումն այդ ցուցանիշից 14 տոկոս իջեցում էր նախատեսում, նշվում է չորեքշաբթի օրը գործակալության կայքում տեղադրված հաղորդագրության մեջ, փոխանցում է ՏԱՍՍ-ը:
«Վարկանիշային գործակալությունն այժմ աշխարհում ավտոմեքենաների վաճառքի 20 տոկոս անկում է սպասում 2020 թվականին, ինչը նախորդ ցուցանիշից ավելի ցածր էր 14 տոկոսով: Կորոնավիրուսի տնտեսական ազդեցությունը խորանում է»,- պարզաբանել են Moody's-ում:
Ըստ այդմ՝ այս տարի Եվրոպայում այս ցուցանիշը կնվազի 30 տոկոսով, ԱՄՆ-ում՝ 25 տոկոսով: Գործակալությունը չի փոխել ընթացիկ տարում Չինաստանում ավտոմեքենաների վաճառքի վերաբերյալ իր կանխատեսումը` 10 տոկոս անկում:
Moody’s-ը չի բացառում, որ հաջորդ տարի աշխարհում ավտոմեքենաների վաճառքը կաճի 11.5 տոկոսով, իսկ G20-ի երկրներում ՀՆԱ-ի կանխատեսված աճը 2021 թվականին 4.8 տոկոս կկազմի:
Ամերիկյան ավտոմոբիլային հսկաներ General Motors-ը, Ford-ը եւ Fiat Chrysler-ը մայիսի 18-ից կվերսկսեն իրենց գործարանների աշխատանքը Միչիգանում, որը դադարեցվել էր համավարակի պատճառով: General Motors-ը, Ford-ը եւ Fiat Chrysler-ը մարտի 18-ին հայտարարել էին Հյուսիսային Ամերիկայում արտադրությունը դադարեցնելու մասին: Ավտոհսկաների ղեկավարությունը շեշտել էր, որ մինչեւ գործարանների վերագործարկումն աշխատակիցներն ընկերություններից գործազրկության նպաստ եւ վճարումներ կստանան:
General Motors-ը մեծ եռյակում միակն էր, ով եկամուտ էր ունեցել այս տարվա առաջին եռամսյակում: Առաջին եռամսյակում GM-ի զուտ շահույթը 0.3 միլիարդ դոլար էր կազմել, եկամուտները հասել էին 32.7 միլիարդ դոլարի: Ընկերությունը համավարակի հետեւանքներից իր ուղղակի եւ անուղղակի վնասը 1.4 միլիարդ դոլար էր գնահատել:
