Արցախի խորհրդարանի այսօր ընթացող հատուկ նիստում ելույթ ունեցավ Հայ եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանը, ով իր խոսքն սկսեց շնորհակալություն հայտնելով Արցախի բոլոր իշխանավորներին՝ սկսած լուսահոգի Արթուր Մկրտչյանով:
«Շնորհակալ ենք իրենցից, վստահ ենք, որ նորընտիր նախագհահ էլ ավելի կավելացնիայդ գանձարանի շտեմարանի վրա իր շարքը, որով ավելի կամրապնդվենք ու ավելի զորեղ կդառնանք:
Նախագահ կնշանակի առաջին գահը, բուրգի վրա բազմողը: Պողոս առաքյալն ասում է՝ ամեն իշխանություն Աստծուց է, հնազանդ եղեք իշխանությանը: Մեր դարերում նախագահ նշանակում է իշխանաց իշխան կամ թագավոր: Եթե ժողովուրդը մեղքի մեջ ընկավ, նախագահը ծնկի իջավ, աղոթեց, Աստված դա անպայման լսում է, բայց եթե առաջին դեմքը սխալվեց, ամբողջ ազգը ծնկի գա, մենք չգիտենք՝ Աստված կների, թե ոչ»,-ասաց նա:
Պարգեւ Սրբազանը դիմեց Արայիկ Հարությունյանին. «Վստահ եմ, որ անմնացորդ կնվիրվեք, ինչպես 17 տարեկանում զենքը ուսին պաշտպանել եք մեր հայրենիքը, այսօր շարունակելու ենք նույն վսեմ առաքելությունը ամենաբարձր դիրքից: Մեր աղոթքն է արդարություն տարածեք, ազնվություն սերմանեք: Միշտ ձեր կողքին ենք լինելու: ժողովուրդը ձեր եւ ձեր թիմի հետ մեծ հույսեր է կապում»,-ընդգծեց նա:
Այնուհետեւ Պարգեւ Սրբազանն իր խոսքն ավարտեց աղոթքով, որի ընթացքում Արայիկ Հարությունյանը ձեռքը դրել էր ավետարանի վրա: