Ազգային ժողովի Գիտության, կրթության, մշակույթի, սփյուռքի, երիտասարդների եւ սպորտի հարցերով մշտական հանձնաժողովի նիստը, որը պետք է տեղի ունենար մայիսի 25-ին 12:00-ին, առայժմ անհայտ պատճառով մի քանի անգամ հետաձգել են: Նիստի օրակարգում ընդամենը մեկ հարց է՝ Բարձրագույն որակավորման կոմիտեի նախագահ Սմբատ Գոգյանի հրաժարականը եւ նրա շուրջ սկանդալը: Հիմա այն պետք է սկսվի 17:00-ին:
Հիշեցնենք, որ Գոգյանի խոսքով՝ իր հրաժարականի պատճառներից մեկը այն է, որ Հայաստանի Պետական տնտեսագիտական համալսարանի ռեկտորի ժամանակավոր պաշտոնակատարի դոկտորական ատենախոսության մեջ կան գրագողության ակնհայտ հետքեր եւ այլ գիտական աշխատանքներից թարգմանություններ, եւ որ այս իրավիճակում ռեկտորը, անկախ ամեն ինչից, շարունակում է համալսարանը ղեկավարել համապատասխան կապերի եւ որոշ հովանավորչության շնորհիվ:
Հանձնաժողովի նիստին, պատգամավորներից բացի, մասնակցելու է նաեւ Սմբատ Գոգյանը, ինչպես նաեւ կրթության, գիտության, մշակույթի եւ սպորտի փոխնախարար Գրիշա Թամրազյանը, որին էլ համարում են ռեկտորի պաշտոնակատարի հովանավորը:
