Հայաստանի Կենտրոնական բանկը ֆինանսական համակարգում դժվարությունների առաջացման դեպքում կարող է տրամադրել լրացուցիչ լիկվիդային միջոցներ: Այս մասին մայիսի 27-ին տեսահամաժողովի ժամանակ ասաց Հայաստանի ԿԲ ֆինանսական համակարգի կայունության եւ զարգացման դեպարտամենտի պետ Անդրանիկ Գրիգորյանը՝ ներկայացնելով «2019 թվականին ֆինանսական կայունության մասին հաշվետվությունը»:
Նրա խոսքով՝ բոլոր դրական միտումները, որոնք 2018 թվականին դիտվել են Հայաստանի բանկային ոլորտում, շարունակվել են նաեւ 2019 թվականին: «Դա, մասնավորապես, վերաբերում է այնպիսի ցուցանիշներին, ինչպես կապիտալի, ակտիվների եւ այլ ցուցանիշների կայուն աճը: Տնտեսական բարձր աճը պայմանավորված էր վարկային միջոցների տրամադրման աճով»,- նշեց Գրիգորյանը:
Նա շեշտեց բանկերի լիկվիդայնության եւ կապիտալիզացիայի բարձր մակարդակի կարեւորությունը, ինչը ֆինանսական կայունության հաջողության գրավականն է: «Ֆինանսական կազմակերպություններին հենց սա է թույլ տվել ժամանակին արձագանքել կորոնավիրուսի տարածման հետ կապված ճգնաժամին: Տնային տնտեսություններին վարկավորման աճի ֆոնին ԿԲ կարեւոր միջոցառում դարձավ վերահսկումը՝ նրանց մոտ պարտքի կտրուկ աճ թույլ չտալու նպատակով ապագայում մարման հետ կապված բարդություններից խուսափելու համար»,- պարզաբանեց դեպարտամենտի պետը:
Նա հավելեց, որ առեւտրային բանկերը մինչեւ հիմա վարկային պարտավորությունների պայմանները վերանայել են 540 հազար ֆիզիկական անձանց եւ 17 հազար իրավաբանական անձանց համար: «Քաղաքացիներին հնարավորություն է ընձեռվել առանց վարկային պատմության վատթարացման 3 ամիս չմարել վարկային պարտավորությունները: Առաջացած դժվարությունները հաշվի առնելով՝ ֆինանսական կազմակերպությունները հիմա էլ են պատրաստ հաճախորդների հետ համագործակցությանը»,- ամփոփեց Կենտրոնական բանկի ներկայացուցիչը: