Մերձմոսկվայում քննիչները ձերբակալել են «Բանդիտ Վասյա» մականունով հայտնի «օրենքով գողի», որը 27 տարի բարձրագույն դիրք է գրավել հանցավոր հիերարխիայում: Այս մասին հայտնում է ՏԱՍՍ-ը՝ վկայակոչելով Քննչական կոմիտեի Մոսկվայի մարզի Քննչական գլխավոր վարչության ներկայացուցիչ Օլգա Վրադիին:
Նրա խոսքով՝ մեղադրյալը մի քանի անգամ դատվել է գողություններ, կողոպուտներ, ավազակային հարձակումներ եւ շորթումներ կատարելու մեղադրանքներով:
Ըստ Քննչական կոմիտեի՝ տղամարդը մշտապես բնակվել է Մոսկվայի մարզի Սերգիեւո-Պոսադսկի, Չեխովսկի եւ Պոդոլսկի շրջաններում:
Նա 1993 թվականին սկսել է համակարգել, ստեղծել կազմակերպված հանցավոր խմբեր եւ դրանց հետ կապ պահպանել:
Բանդիտի հաշվեկշռում են առեւանգումներ, փողի շորթումներ, ավազակային հարձակումներ, խարդախություններ, անօրինական բիզնեսի կազմակերպում:
56-ամյա «օրենքով գողի» դեմ քրեական գործ է հարուցվել հանցավոր հիերարխիայում բարձրագույն դիրք զբաղեցնելու վերաբերյալ (ՌԴ ՔՕ 210.1 հոդված):
Ներկայումս նրա հետ աշխատում են քննիչները, կատարվում են խուզարկություններ եւ քննչական այլ գործողություններ:
