Ֆրանսիայի ոստիկանությունը բողոքի երթ է կազմակերպել Ելիսեյան դաշտերի երկայնքով դեպի ներքին գործերի նախարարություն: Ոստիկանությունը կառավարությանը մեղադրել է ոստիկանությանը քավության նոխազ դարձնելու մեջ, որպեսզի այդպիսով նվազեցվի ռասայական խտրականության հետ կապված հասարակության զայրույթը, հաղորդում է Reuters-ը:
Նախօրեին Ֆրանսիայի մի շարք քաղաքներում եւ բնակավայրերում բողոքի ակցիաներից հետո ոստիկանական արհմիությունների եւ ներքին գործերի նախարար Քրիստոֆ Կաստաների միջեւ հանդիպում է տեղի ունեցել:
Արհմիությունները նախագահ Էմանուել Մակրոնին եւ նրա կառավարությանը մեղադրում են անարգանքի մեջ այն բանից հետո, երբ Կաստաները խոստացել է «զրոյական հանդուրժողականություն» եւ արգելել կասկածյալների ձերբակալության ժամանակ խեղդելու հնարքը:
«Գործընկերներն այլեւս չեն կարող դա հանդուրժել»,-հայտարարել է Ազգային ոստիկանության դաշինքից Ֆաբիեն Վանհեմելրիկը այն բանից հետո, երբ ցուցարարները մոտեցել են ՆԳՆ դարպասների մոտ:
Ոստիկանական արհմիությունների ավտոմեքենաների վրա տեղադրված են եղել պաստառներ գրությամբ՝ «Չկա ոստիկանություն, չկա խաղաղություն»:
«Մեզ պետք է պաշտպանել, հարգել: Ոստիկանությունը երբեք չպետք է լինի օրենքից վեր, սակայն երբեք չպետք է օրենքից ցածր լինի»,-ասել է Վանհեմելրիկը:
Ամբողջ աշխարհում բողոքի ալիք է բարձրացել Մինեապոլիսում ոստիկանների կողմից աֆրոամերիկացի Ջորջ Ֆլոյդի սպանությունից հետո: Ոստիկանները բերման ենթարկելու ժամանակ խեղդել են նրան:
Շաբաթ օրը Փարիզում ծրագրված է Black Lives Matter բողոքի ակցիայի անցկացում: Ոստիկանությունը կոչ է արել փակել խանութները, ռեստորանները անկարգությունների ռիսկի պատճառով:
