Այն բանից հետո, երբ Ֆրանսիայի Սենատը օրակարգում չընդգրկեց Հայոց ցեղասպանության ժխտման քրեականացման օրինագիծը, շատ հայկական կազմակերպություններ դատապարտեցին սենատորների դիրքորոշումը: Նրանց թվում նաեւ Հայ-եվրոպական խորհուրդը, որը բաց նամակ է հղել Ֆրանսիայի Սենատին: Նամակում մասնավորապես ասված է, թե Ֆրանսիայի հայազգի քաղաքացիներն ու մարդասիրական արժեքների պաշտպանները վրդովված են եւ չեն հասկանում այդ դիրքորոշումը: «Ձեր որոշմամբ դուք պարզապես ահազանգ եք փոխանցում թուրքական պետությանը, եւ ժխտման քաղաքականությունն ավելի կատաղի է լինելու Ֆրանսիայում»,- նշել են նրանք:
Նամակի հեղինակները նշել են նաեւ, որ սենատորներն իրենց պատասխանատու են դարձրել ժխտողական քաղաքականության ապագա հանցագործությունների համար»:
Ինչպես արդեն նշել է NEWS.am-ը, Ֆրանսիայի Սենատը մայիսի 4-ին, 196 «դեմ» եւ 74 «կողմ» ձայներով Օսմանյան կայսրությունում 20-րդ դարասկզբին տեղի ունեցած Հայոց ցեղասպանության ժխտումը քրեականացնող օրենքի նախագիծը հրաժարվել է ընդգրկել օրակարգում:
