Ես չեմ հավակնում ՍԴ նախագահի պաշտոնին: Այս մասին, այսօր՝ հունիսի 26-ին, ՍԴ-ի շենքի մոտ լրագրողների հետ զրույցում հայտարարեց ՍԴ դատավոր Վահե Գրիգորյանը:
Գրիգորյանը նշեց, որ այսօրվանից ինքը սկսելու է մասնակցել ՍԴ նիստերին:
Հարցին՝ գտնում է արդյո՞ք, որ ինքը բարեխղճորեն կատարել է իր լիազորությունները, Գրիգորյանը հայտարարեց, որ անցած մեկ տարվա ընթացքում չի կարողացել կատարել իր աշխատանքային պարտականությունները, քանի որ «ՍԴ կազմի սահմանադրականությունը լրջորեն հարցականի տակ էր». «Ես այս կազմը սահմանադրական չեմ համարել և համարել եմ, որ Հայաստանի ՍԴ-ն ունի դեմոկրատական լեգիտիմության էական բաց և այդ կազմով չի կարող հանդիսանալ ու արժանի լինել ՀՀ ՍԴ լինելուն»:
Նա ասաց, որ իր պարտականությունները չի կատարել ոչ իր մեղքով, իսկ դատավորի աշխատավարձից չի հրաժարվել, քանի որ այն իր ապրուստի միակ միջոցն է:
«Որպես դատավոր աշխատավարձն իմ միակ ապրուստի միջոցն ա։ Եթե ես հրաժարվեմ այդ ապրուստի միջոցից, որքանով դուք որպես ՀՀ քաղաքացի ապահով ձեզ կզգաք՝ մտածելով՝ իսկ ինչոՎ ա ապրում այդ դատավորը, ուրիշ ի՞նչ եկամուտներով պիտի ապրի։ Դուք ինձ հարցնում եք՝ արդյոք պետական պաշտոնյան չաշխատելով պետք է աշխատավարձ ստանա: Ոչ, չպետք է ստանա, բայց ես չեմ համարում, որ այս դատարանում եղել է անհրաժեշտ քվորում: Այն չի եղել, այսօրվանից գոյություն ունի: Եվ եթե ժամանակին ՍԴ որեւէ անդամ կարծեր, որ սա իրապես խնդիր է, վաղուց իմ նկատմամբ կարգապահական վարույթը պետք է հարուցված լիներ: Մի անգամ կիսաբացատրություն է հնչել, որ իբր վարույթ չենք հարուցում մարդասիրական նկատառումներից ելնելով: Սա, կներեք, փարիսեցիություն եւ սոփեստություն է»,-ասաց Գրիգորյանը: