Սյունիքում այսօր` մայիսի 11-ին ժամը 13:30-ի սահմաններում «ԶՊՄԿ» ՓԲԸ-ի թափոնաջրերը կրկին լցվել են Շղարշիկ բանավանի քաղաքացի Վլադիմիր Մկրտչյանի դարպասից մի քանի մետր հեռավորությամբ գտնվող թափոնաջրերի լիճը, որն առաջացել էր դեռեւս 2011 թվականի մայիսի 8-ին:
Վ.Մկրտչյանի դարպասի հարեւանությամբ առաջացած թափոնաջրերի լճից մոտ 40 մետր ներքեւ է գտնվում բանավանի հիմնական աղբյուրը, որից օգտվում են բնակիչները: Թափոնաջրերի լճից տհաճ հոտ է գալիս, որը բացասաբար է ազդում բանավանի բնակիչների առողջական վիճակի վրա:
Կատարվածի մասին Հայաստանի երիտասարդ իրավաբանների ասոցիացիայի Սյունիքի մարզային մասնաճյուղի, ՀԵԻԱ-ի կողմից գործարկվող Սյունիքի մարզի Շահերի պաշտպանության եւ աջակցության կենտրոնի ղեկավար, փաստաբան Արշավիր Խալափյանի կողմից արդեն ուղարկվել է երկրորդ հաղորդումը Սյունիքի մարզի դատախազություն:
Հիշեցնենք, որ դեռեւս մայիսի 8-ի առավոտյան «ԶՊՄԿ» ՓԲԸ-ի պոչատարից թափոնաջրերի արտահոսք էր տեղի ունեցել, որի հետեւանքով տրակտորով պատրաստված փոսն ամբողջությամբ լցվել է թափոնաջրերով:
