ՀՀ բարձր տեխնոլոգիական արդյունաբերության նախարար Հակոբ Արշակյանն ընդունել է Հայաստանի Հանրապետությունում Ամերիկայի Միացյալ Նահանգների արտակարգ եւ լիազոր դեսպան Լին Թրեյսիին: Այս մասին հայտնում են ՀՀ բարձր տեխնոլոգիական արդյունաբերության նախարարությունից։
Ողջունելով դեսպանին նախարարն անդրադարձել է Covid-19 համավարակի հետեւանքով Հայաստանում եւ ԱՄՆ-ում ծագած մարտահրավերին եւ հույս հայտնել, որ համատեղ ջանքերով հնարավոր կլինի հաղթահարել ստեղծված իրավիճակը։ Նախարարը ներկայացրել Հայաստանում համավարակի տնտեսական հետեւանքները մեղմելուն ուղղված պետական աջակցության ծրագրերի ընթացքը:
Դեսպան Լին Թրեյսին նշել է, որ Հայաստանը շարունակում է ուրվագծել իր բարձր տեխնոլոգիական ապագան, եւ այդ համատեքստում կարեւորում է նախարար Արշակյանի հետ մտքեր փոխանակելու այս հնարավորությունն այնպիսի նախաձեռնությունների շուրջ, որոնք կօգնեն Միացյալ Նահանգներին ու Հայաստանին նորարարության առաջամարտիկների դիրքում լինել եւ ավելի մեծ տնտեսական աճի հետամուտ լինել այնպիսի եղանակներով, որոնք համահունչ են ընդհանուր արժեքներին եւ բխում են ազգային անվտանգության շահերից։
Խոսելով համավարակի մասին՝ դեսպանը նշել է, որ չնայած աշխարհում գործընթացները դանդաղել են, եւ ակտիվ ներդրումները էականորեն նվազել, սակայն Միացյալ Նահանգները շարունակում են հետաքրքրված լինել Հայաստանում ներդրումների իրականացմամբ:
Հակոբ Արշակյանը նշել է, որ ԱՄՆ Սիլիկոնյան հովիտը հանդիսանում է Հայաստանի բարձր տեխնոլոգիական արդյունաբերության համագործակցության գլխավոր ուղղություններից մեկը, եւ ԲՏԱՆ կողմից իրականացվող Վիրտուալ կամուրջ ծրագրի շրջանակներում ապահովվելու է 45 մասնակիցների այցելություն Սիլիկոնյան հովիտ՝ ներդրումների ներգրավման եւ Դրեյփերի համալսարանում գործարար փորձառության ձեռքբերման նպատակով:
Նախարարը մատնանշել է թվայնացման եւ կիբերանվտանգության օրակարգերն ու ձեւավորվող ռազմավարական մոտեցումները, կիբերանվտանգության կենտրոնի ստեղծման, համակարգային եւ խորքային զարգացումների ուղղությամբ տարվող աշխատանքները, որոնք կարող են հիմք հանդիսանալ ներդրումների եւ հետագա փոխգործակցության համար:
Լին Թրեյսին բարձր է գնահատել հատկապես այն հանգամանքը, որ Հայաստանն իր բարձր տեխնոլոգիական առաջընթացն առավելապես կապում է գիտելիքի եւ կրթության հետ՝ մատնանշելով փորձագետների ներգրավման հնարավորությունների զարգացումը:
Հանդիպման ընթացքում անդրադարձ է կատարվել նաեւ կիբերանվտագության եւ նորագույն 5G ծածկույթի հետ պայմանավորված ռիսկերի գնահատման ու կառավարման գործընթացներին, ամերիկյան PayPal-ի, Youtube-ի եւ Google-ի՝ հայաստանյան շուկայում հանդես գալու հիմնախնդիրներին, ինչի ուղղությամբ ակտիվ աշխատանքներ են տարվում՝ հայաստանյան տնտեսվարողների համար առավել հարմարավետ պայմաններ ստեղծելու նպատակով:
Կողմերը բարձր են գնահատել տեխնոլոգիական արդյունաբերության ուղղությամբ տարվող աշխատանքները եւ պայմանավորվածություններ ձեռք բերել փոխգործակցության հնարավոր ուղղությունների եւ ժամանակացույցի հետագա քննարկումների վերաբերյալ:
