Ամերիկյան Ford ընկերությունն ավարտել է իր մոդելային շարքում վերջին սեդանի արտադրությունը․ այժմ մակնիշը միայն կթողարկի ամենագնացներ, քրոսովերներ, պիկապներ եւ սպորտքարեր, հաղորդում է Motor-ը։

Այս գարնանը Ford-ը հայտարարել է իր մոդելային գամմայում վերջին սեդանից առաջիկայում հրաժարվելու մասին․ Fusion-ը, որը հայտնի է եվրոպական շուկայում Mondeo անունով, որոշվել է չեղարկել արտադրությունից պահանջարկի անկման պատճառով։ 2019 թվականին ԱՄՆ-ում վաճառվել է այդ սեդանի ավելի քան 166 հազար նմուշ, եւս 37 հազար ավտոմեքենա հնարավոր է դարձել իրացնել ընթացիկ տարվա առաջին եռամսյակում։ Այժմ The Detroit Bureau պարբերականի հաղորդմամբ, թողարկվել է Ford Fusion սեդանի վերջին նմուշը։

Մեքսիկայի էրմոսիլնո քաղաքի գործարանում վերջին սեդանի փոխարեն կարտադրվի նորագույն Bronco Sport-ը, որը կդառնա մակնիշի ամենահասանելի քրոսովերը։ Ավելի վաղ Ford-ն արդեն դադարեցրել էր ԱՄՆ-ում արտադրել այնպիսի մոդելները, ինչպես Fiesta-ն, Focus-ը եւ Taurus-ը։ Սեդաններն աստիճանաբար անցնում են պատմության գիրկը նաեւ այլ ապրանքանիշերի արտադրության մեջ, ինչպիսին է Chevrolet-ը, որը վերջերս «թոշակի է ուղարկել» Impala մոդելը։