Հայկական գյուղատնտեսական արտադրանքի իրացման հետ կապված Ռուսաստանում առաջացած խնդիրների կապակցությամբ քննարկումներ են տեղի ունեցել Եվրասիական տնտեսական հանձնաժողովի շրջանակներում: Այս մասին այսօր` օգոստոսի 14-ին, հայտարարեց էկոնոմիկայի նախարար Տիգրան Խաչատրյանը` մեկնաբանելով լրագրողների հարցն այն մասին, թե նախարարությունն ինչ քայլեր է ձեռնարկել խնդիրը լուծելու եւ հետագայում նման գործողությունների կրկնությունը կանխելու համար: Նախարարը նշեց, որ տեղի ունեցած երեւույթների բնույթը քննարկումներ Ռուսաստանի Դաշնության տնտեսական պետական կառույցների հետ չի ենթադրում, քանի որ խնդիրը ծագել է մասնավոր հատվածում եւ չունի տնտեսական հիմք: Այնուամենայնիվ, շարունակեց Խաչատրյանը, նախարարությունը մշտական կապի մեջ էր դեսպանության եւ այն օղակների հետ, որոնք օգնում էին ապահովել հայկական գյուղմթերքների վաճառքը:
Լրագրողների հարցին` արդյոք հայկական կողմը որեւէ երաշխիք ունի, որ նման սցենարները չեն կրկնվի, Խաչատրյանը նշեց, որ այդ ուղղությամբ աշխատանքներ են տարվում, ընթանում են աշխատանքային քննարկումներ եւ խորհրդակցություններ: Նախարարը նշեց, որ հարցը քննարկվել է նաեւ ԵՏՀ շրջանակներում: «Հայաստանի տնտեսավարող սուբյեկտների եւ արտահանողների համար` որպես ԵՏՄ լիիրավ անդամ, երաշխավորված են Ռուսաստանի տարածքում գործող այն նույն պայմանները, որոնք տրամադրվում են ռուսաստանյան տնտեսվարող սուբյեկտներին: Եթե այս հարցում խնդիրներ են առաջանում, ապա դրանք լուծվում են ԵՏՀ ձեւաչափով»,- հիշեցրեց նախարարը: Հիշեցնենք, որ հայ-ադրբեջանական սահմանին իրավիճակի սրվելուց հետո գյուղմթերքի հայաստանյան արտահանողների մոտ իրացաման հետ կապված խնդիրներ են ծագել: Մասնավորապես, որոշ շուկաների սեփականատերեր` ծագումով ադրբեջանցի, հրաժարվեցին հայ արտահանողներին իրենց արտադրանքն իրացնելու տեղեր տրամադրել:
